Ֆրանսիայի նախագահ Էմանուել Մակրոնը երեքշաբթի օրը՝ մարտի 11-ին, կոչ է արել մոտ երեսուն երկրների գլխավոր շտաբների պետերին, որոնք հավաքվել էին Փարիզում փակ հանդիպման համար, սկսել մշակել Ուկրաինայի «անվտանգության հուսալի երաշխիքներ» Ռուսաստանի հետ խաղաղության համաձայնագրի դեպքում, գրել է «Le Figaro» թերթը՝ հղում անելով Ելիսեյան պալատին։

AFP գործակալության փոխանցմամբ՝ Փարիզում կայացած հանդիպմանը մասնակցել են 34 երկրների ներկայացուցիչներ։ Սա մեծ մասամբ վերաբերում է ԵՄ-ի և ՆԱՏՕ-ի անդամ երկրներին, բայց ոչ միայն։ Մասնավորապես, բանակցություններին ներկա են եղել ներկայացուցիչներ Ավստրալիայից, Նոր Զելանդիայից և Ճապոնիայից։ ԱՄՆ-ը ներկայացված չի եղել միջոցառմանը։

Ըստ Ֆրանսիայի նախագահի մամուլի ծառայության՝ հանդիպման մասնակիցները համաձայնել են, որ Ուկրաինայի անվտանգության երաշխիքները «չպետք է տարանջատվեն ՆԱՏՕ-ից և նրա հնարավորություններից»։ Նման երաշխիքները պետք է լինեն «հուսալի և երկարաժամկետ և ուղեկցվեն ուկրաինական բանակին շարունակական աջակցությամբ»: