Ամերիկացի բուսաբանների խումբը Տեխասի Բիգ Բենդ ազգային պարկում հայտնաբերել է Quercus tardifolia կարմիր կաղնի, որն անհետացած էր համարվում: Այս մասին հայտնել է Չիկագոյի Մորթոնի դենդրարիումի մամուլի ծառայությունը։
Մինչ օրս համարվում էր, որ Quercus tardifolia կարմիր կաղնին անհետացել է 20-րդ եւ 21-րդ դարերի սահմանագծին: Չնայած ամբողջ աշխարհում կարմիր կաղնու տարածվածությանը, Quercus tardifolia տեսակի վերջին հայտնի ծառը մահացել է 2011 թվականին:
Մորթոնի դենդրարիումի փոխնախագահ Մերֆի Վեսթվուդի խոսքով՝ տարբեր տեսակների անհետացումը անդառնալի հետեւանքներ է խոստանում շրջակա միջավայրի համար, ինչը կհանգեցնի հսկայական թվով կենդանի արարածների անհետացման։
Մասնագետների կարծիքով՝ Բիգ Բենդ այգում հայտնաբերված կաղնին անմխիթար վիճակում է՝ հետազոտողները հայտնաբերել են սնկային վարակի օջախներ, իսկ ծառի բունը վնասվել է անտառային հրդեհներից մեկի ժամանակ։
Առայժմ գիտնականները քննարկում են ծառը եւ Quercus tardifolia տեսակն ամբողջությամբ փրկելու ծրագիրը: Այսպես, մասնագետները ծառից ԴՆԹ-ի նմուշներ են հավաքել՝ սնկային վարակների նկատմամբ նրա հակվածությունը պարզելու համար:
Հետազոտության արդյունքները տագնապալի են հետազոտողների համար, քանի որ հայտնաբերված կաղնին կաղին չի տալիս, ինչը մեծապես կբարդացնի տեսակի պահպանման գործողությունը։