Տավուշի մարզի Բերդ համայնքի ավագանու նիստը, որտեղ պետք է ղեկավար ընտրեին, երեկ սկսվել է արտակարգ պայմաններում. քվեարկությունից ժամեր առաջ հաղորդվել է, թե ձերբակալվել է նախկին համայնքապետ Հարություն Մանուչարյանը, ում ղեկավարած «Հզոր համայնք» դաշինքն ամենաշատ թվով ձայներն էր ստացել սեպտեմբերին կայացած համայնքային ընտրություններում:
Ընդ որում, Մանուչարյանն այդ ժամանակ գտնվում էր բանտում իր պաշտոնավարման տարիներին պաշտոնեական դիրքը չարաշահելու և կեղծիք կատարելու մեղադրանքով: Հիմա Մանուչարյանը ձերբակալվել է մեկ այլ կոռուպցիոն գործով:
Իհարկե, մենք կանխակալ կարծիք չենք հայտնելու, կասկածի տակ չենք ուզում դնել ո՛չ իրավապահ մարմինների օբյեկտիվությունը և ո՛չ էլ, հատկապես, Մանուչարյանի անմեղության կանխավարկածը:
Բայց չենք կարող չնկատել, որ իշխանության «հակակոռուպցիոն ակտիվության» շրջանը «պատահաբար» համընկնում է ընտրական ցիկլի հետ, մանավանդ, երբ որևէ համայնքում ՔՊ-ն պարտվում է իշխանության համար անցանկալի կուսակցության ու դաշինքի: Եթե անգամ իշխանությունը տրվում է «դեմոկրատական զեղումների» ու մի կերպ «կուլ» է տալիս ընտրությունների արդյունքները, հետո անպայման փորձում է «խմբագրել» դրանք՝ օգնության կանչելով իրավապահ մարմիններին ու քրեական գործերը:
Այդ ճանապարհով իշխանությունները կարողացան խոչընդոտել Մամիկոն Ասլանյանի կանխատեսելի ընտրությունը Վանաձորի քաղաքապետի պաշտոնում՝ կառավարման ճգնաժամ ստեղծելով երրորդ քաղաքում: Բերդում դա չի հաջողվել. հաղթանակած ընդդիմադիր դաշինքն առաջադրել ու ընտրել է նոր քաղաքապետ: Բայց համոզված ենք՝ իշխանության ռեպրեսիվ մեքենան դեռ նոր է սկսել իր «սև գործը»...
Վահրամ Բագրատյան