Էն օրենքները, որոնք ձեր իշխանությունն է իրականացնելու, շատ վատ հետևանքներ են ունենալու, նույնիսկ ամենաբարվոք օրենքներն այնպիսի խայտառակ բացթողումներով են իրականացվում, որ հաճախ ձեռնպահ քվեարկելը միակ տարբերակն է։ Այս մասին այսօր ԱԺ-ում ամբիոնից ասաց «Պատիվ ունեմ» խմբակցության ղեկավար Հայկ Մամիջանյանը։
«Որոշ պարագայում մենք փորձում ենք գտնել որևէ լավ բան, որ երկիրը շարունակի գոնե գոյատևել, մինչև ձեզնից ազատվենք»,-ասաց նա։
Մամիջանյանին արձագանքեց ԱԺ փոխնախագահ Ռուբեն Ռուբինյանը։
«Պարոն Մամիջանյան, արտահերթ մի հատ հարց տամ էլի, հետաքրքիր ա ուղղակի։ Դուք, երբ պարոն Թունյանին ասացիք, որ ձեզ չի հետաքրքրում, ենթադրաբար, ՔՊ-ն ինչպես կքվեարկի, դուք գիտեք, չէ՞, որ թեկնածուն կընտրվի, եթե ՔՊ-ն կողմ քվեարկի, չի ընտրվի, եթե չքվեարկի, հետևաբար հարց. ձեզ հետաքրքրո՞ւմ ա ձեր ներկայացրած թեկնածուն կընտրվի, թե չէ: Ձեր ասածից բխում ա, որ ձեզ չի հետաքրքրում»,-հետաքրքրվեց Ռուբինյանը։
Մամիջանյանը նշեց, որ ինստիտուտին օգուտ կլինի, որ թեկնածու Անահիտ Սարգսյանն աշխատի ՀՀ մրցակցության պաշտպանության հանձնաժողովի կազմում։
«Ես մինչ էսօր խոսքի ու գործի շեղում երբեք չեմ առաջացրել, և եթե ես ասում եմ, որ ձեզ չեմ ընկալում որպես հայրենասեր իշխանություն, դրանից հետևում է, որ ինձ ձեր քվեարկությունը չի հետաքրքրում։ Իրո՞ք ակնկալում էիք, որ պիտի գայի, ձեզնից խնդրեի, որ քվեարկեք մեր թեկնածուի օգտին։ Ձեր ակնկալիքը կմնա զուտ ակնկալիք, հակառակ դեպքում կտուժի հանձնաժողովը»։
Ռուբինյանն արձագանքեց, որ իր հարցի պատասխանը դեռ չի լսել. «Հիմա ձեզ հետաքրքրում է՝ ձեր թեկնածուն կընտրվի, թե չէ, եթե չի հետաքրքրում, խնդրում եմ ասեք»։
«Դանդաղ ասելս էլ չփրկեց, անգլերեն երևի ասեմ, պարոն Ռուբինյան»,-արձագանքեց Մամիջանյանը։
«Ի՞նչ ասեք, անգլերե՞ն, խնդրեմ ասեք, բայց մեր պետական լեզուն հայերենն է, համեցեք»,-ասաց Ռուբինյանը։
«Ես գիտեի՝ ԱԺ եմ գալիս, ոչ թե դպրոցական հանդեսի»,-արձագանքեց Մամիջանյանը։
Ի վերջո, բանավեճը երկարեց, Մամիջանյանն էլ նշեց, թե ՔՊ-ի քվեարկությունն իրեն ավելի քիչ է հետաքրքրում, քան փոկերի գլխաքանակը։
«Տիկին Սարգսյան, ավելի լավ ա ձեզ Մամիջանյանը չներկայացներ, ինչը, ի դեպ, չի նշանակում, որ մենք որոշում ունենք ձեր ընտրվելու մասով»,-ասաց Ռուբինյանը։
Մամիջանյանը միջամտեց, որին Ռուբինյանն արձագանքեց․ «Լռեք, խոսքը ձերը չէ»։
Մանրամասները՝ տեսանյութում