Այսօր՝ փետրվարի 7-ին, ավտովթար է տեղի ունեցել Կոտայքի մարզում։ Ժամը 13։50-ի սահմաններում Երևան-Սևան ավտոճանապարհի 45 կմ հատվածում դեպի Երևան ընթանալիս բախվել են Գեղարքունիքի մարզի բնակիչ՝ 65-ամյա Բարիտոն Խ-ի վարած VAZ 2121 մակնիշի և Կոտայքի մարզի բնակիչ՝ 40-ամյա Գոռ Մ-ի վարած Opel մակնիշի ավտոմեքենաները։

Ինչպես հայտնում է ֆոտոլրագրող Գագիկ Շամշյանը, վթարի հետևանքով Նիվայի ուղևորներ՝ Գեղարքունիքի մարզի բնակիչներ, 53-ամյա Գարիկ Հ-ն և 67-ամյա Գագիկ Մ-ն մարմնական վնասվածքներով տեղափոխվել են «Սևան» ԲԿ։ 

Բախման հետևանքով Նիվան դուրս է եկել երթևեկելի գոտուց և հայտնվել երկաթե արգելապատնեշի վրա։ 

Վիրավորներին առաջինը օգնության են հասել այդ պահին Երևանից դեպի Լոռու մարզ ողևորվող «Վանաձոր» ԲԿ-ի շտապբուժօգնության խումբը։ 

Վարորդ Սամվել Առաքելյանը, բժիշկ Տիգրան Ենգոյանն ու բուժքույր Հասմիկ Հակոբյանը, իջնելով շտապօգնության ավտոմեքենայից, Նիվայի մեջ ինքնազգացողությունը վատացած քաղաքացուն շտապ դուրս են բերել ավտոմեքենայից , իսկ 1 հոգու էլ հայտնաբերել են ավտոմեքենայից դուրս՝ անօգնական վիճակում և նրան տեղում առաջին բուժօգնությունը ցուցաբերելուց հետո իրենց շտապօգնության ավտոմեքենայով տեղափոխել են «Սևան» ԲԿ։ 

Վթարի փաստով Կոտայքի մարզային քննչական վարչությունում նախաձեռնվել է վարույթ։