ՌԴ նախագահի մամուլի քարտուղար Դմիտրի Պեսկովը հայտարարել է, որ BRICS-ը չի քննարկում միասնական արժույթի ստեղծման հարցը՝ դրանով իսկ հերքելով ԱՄՆ նախագահ Դոնալդ Թրամփի հայտարարությունները։
Մեկնաբանելով դոլարին այլընտրանք ստեղծելու փորձերի դեպքում BRICS երկրների ապրանքների վրա 100% մաքսատուրքեր սահմանելու մասին Թրամփի հայտարարությունները՝ Պեսկովն ընդգծել է, որ ասոցիացիան այլ հարցեր են քննարկում։
«BRICS-ը խոսում է նոր համատեղ ներդրումային հարթակներ ստեղծելու մասին, որոնք թույլ կտան համատեղ ներդրումներ կատարել երրորդ երկրներում, փոխադարձ ներդրումներ։ Ահա թե ինչի մասին է խոսքը»,- պարզաբանել է Պեսկովը, գրել են ԶԼՄ-ները։
Նա նաեւ նշել է, որ փորձագետները պետք է Թրամփին ավելի մանրամասն բացատրեն BRICS-ի օրակարգը։
Պեսկովն ընդգծել է, որ Դոնալդ Թրամփի հայտարարությունները նորություն չեն, և որ նա արդեն նման թեզեր է արտահայտել մինչև ԱՄՆ նախագահ ընտրվելը։