Նեպալի կառավարությունը որոշել է երկրում արգելել TikTok սոցիալական ցանցը։ Գրել է Reuters-ը։ Այս մասին հայտարարել է ՏՏ նախարար Ռեխա Շարման կառավարության նիստից հետո, որտեղ քննարկվել է այդ հարցը։
Նրա խոսքով՝ ուսումնասիրվում է երկրում TikTok-ի փակման տեխնիկական կողմը, և համապատասխան կարգադրություն է ուղարկվել ինտերնետ ծառայություններ մատուցողներին։
TikTok-ը, որը պատկանում է չինական ByteDance ընկերությանը, Նեպալում վեցերորդ ամենատարածված սոցիալական ցանցն է: Սակայն իշխանությունները նշում են, որ TikTok-ն օգտագործվում է բովանդակություն տարածելու համար, որը խաթարում է «սոցիալական ներդաշնակությունը և քայքայում ընտանեկան կապերն ու համայնքային հարաբերությունները»:
Բացի այդ, հաղորդվել է, որ TikTok-ի հետ կապված կիբերհանցագործությունները աճում են, և վերջին չորս տարիների ընթացքում Նեպալում ավելի քան 1600 նման կիբերհարձակումներ են տեղի ունեցել:
Մինչդեռ Նեպալի ղեկավարության ոչ բոլոր ներկայացուցիչներն են աջակցել կառավարության որոշմանը։
Այսպես, իշխող կոալիցիայի մաս կազմող Նեպալի Կոնգրես կուսակցության ղեկավարը կարծիք է հայտնել, որ TikTok-ի արգելքը հանդիսանում է «կարծիքի ազատության ճնշում»։
«Կանոնակարգումն անհրաժեշտ է՝ խանգարելու նրանց, ովքեր չարամտորեն օգտագործում են սոցիալական մեդիան: Բայց կանոնակարգման անվան տակ սոցիալական ցանց փակելը միանգամայն սխալ է»,- ասել է Գագան Թափան։