Մարդու իրավունքների եվրոպական դատարանը (ՄԻԵԴ) թուրք իրավապաշտպան Օսման Քավալայի գործով իր որոշմամբ չարդարացրեց Անկարայի սպասելիքները, ևս մեկ անգամ կասկածի տակ դրեց մարդու իրավունքների պաշտպանության եվրոպական համակարգի վստահելիությունը: «РИА Новости» գործակալության փոխանցմամբ՝ այդ մասին նշվում է Թուրքիայի ԱԳ նախարարության խոսնակ Տանժու Բիլգիչի հայտարարության մեջ։
Օսման Քավալան հայտնի թուրք իրավապաշտպան է, Anadolu Kültür AŞ մշակութային հիմնադրամի հիմնադիրը, որը, մասնավորապես, աջակցում է էթնիկ և կրոնական փոքրամասնությունների նախագծերին, որոնք հաճախ միջազգային ուղղվածություն ունեն, ներառյալ թուրք և հայ բնակչության հաշտեցումը և քրդական հարցի խաղաղ լուծումը։
2020 թվականի փետրվարին թուրքական դատարանն արդարացրել էր Քավալային 2013 թվականին Ստամբուլում Գեզիի զբոսայգու ցույցերի գործով իշխանությունը տապալելու փորձի մեջ ներգրավված լինելու մեղադրանքով, սակայն նույն օրը Ստամբուլի դատախազությունը նրա ձերբակալության նոր հրաման էր տվել։ Քավալային նոր մեղադրանք էր առաջադրվել՝ այս անգամ Թուրքիայում 2016 թվականի հուլիսին հեղաշրջման փորձին մասնակցելու համար։ Ավելի վաղ դատարանը Քավալային դատապարտել էր ցմահ ազատազրկման։
ՄԻԵԴ-ը երկուշաբթի հայտարարել է իր որոշումը՝ 2022 թվականի փետրվարի 2-ին Օսման Քավալայի գործով Եվրախորհրդի Նախարարների կոմիտեի կողմից նախաձեռնված խախտման ընթացակարգով։ ՄԻԵԴ-ը որոշել է, որ Թուրքիան խախտել է ՄԻԵԴ-ի 46/1 հոդվածը այն հիմնավորմամբ, որ «այն չի կատարել ՄԻԵԴ-ի որոշումների հետ կապված իր պարտավորությունները»: Որոշվել է հատուցել Քավալայի դատական ծախսերը 7500 եվրոյի չափով։ Որոշումն ընդունվել է 16 կողմ, 1 դեմ ձայների հարաբերակցությամբ։ Միակ դեմ քվեարկողը եղել է թուրք դատավորը։