Վաղ առավոտից վանաձորցիներից զանգեր ու նամակներ եմ ստանում․ մարդիկ ոգևորված են առաջարկով, բավականին հուսադրված են։ MediaHub.am-ի հետ զրույցում ասաց Վանաձորի ավագանու «Հայրենիք» խմբակցության ղեկավար Վահե Դոխոյանը՝ անդրադառնալով իր այսօրվա հայտարարությանը՝ համայնքում ավագանու արտահերթ ընտրություններ անցկացնելու անհրաժեշտության հետ կապված։

Նա նշեց, որ ավագանու խմբակցություններից դեռևս որևէ արձագանք չի ստացել։

«Բայց քաղաքացիները շատ ոգևորված են»,- ասաց նա։

Իսկ ի՞նչ են մտածում արտահերթ ընտրություններ անցկացնելու առաջարկի մասին մյուս խմբակցությունները։ MediaHub.am-ը փորձեց պարզել՝ զրուցելով Վանաձորի ավագանու «Ասլանյան» դաշինք խմբակցության անդամ Արթուր Օհանյանի հետ։

«Մենք ծանոթ ենք Վահե Դոխոյանի հայտարարությանը, բայց դրա շուրջ որևէ քննարկում չենք ունեցել։ Մեզ համար հասկանալի չեն մեխանիզմները»,- ասաց Օհանյանը։

Դիտարկմանը, թե արդյո՞ք նպատակահարմար չէ հարցը քննարկել և հասկանալ առաջարկված մեխանիզմները, Օհանյանն արձագանքեց, որ իրենք խմբակցության ներսում քննարկում պետք է ունենան, ապա նաև հանդիպեն Վահե Դոխոյանին՝ լսելու նրա տարբերակը։

«Իրեն կլսենք, եթե ունենանք այլընտրանք, ապա կառաջարկենք»,- նշեց նա։

Եթե «Ասլանյան» դաշինքը դեռ չունի հստակ կարծիք, ապա «Ապրելու երկիրը» հստակ պնդում է՝ կողմ է արտահերթ ընտրություններին, ավելին՝ դա իրենց օրակարգում է արդեն մեկ տարի։

«Մենք մեկ տարի է՝ դա ենք ասում, և միանշանակ կողմ ենք արտահերթ ընտրություններ անցկացնելուն»,- մեզ հետ զրույցում ասաց Վանաձորի ավագանու «Ապրելու երկիր» խմբակցության անդամ Արտավազդ Ալավերդյանը:

Նշենք, որ թեև «Ապրելու երկիրը» նշում է, որ արտահերթ ընտրություններ անցկացնելու օրակարգ միշտ ունեցել է, բայց և այնպես, բյուջեի նախագծի քննարկման համար գումարված արտահերթ նիստերին մասնակցելիս չի բարձրաձայնել նոր ընտրություններ անցկացնելու անհրաժեշտության մասին։ Հակառակը՝ նախատում էին նիստից բացակայած ավագանու անդամներին, որ բաց են թողնում այդ հարցի քննարկումը։

Իսկ թե ինչ է մտածում այս ամենի մասին Նիկոլ Փաշինյանի նշանակած համայնքապետի պաշտոնակատար Արկադի Փելեշյանը, չհաջողվեց պարզել, քանի որ նրա հեռախոսահամարին արձագանքեց վարորդը (ավանդական պատասխան անցանկալի հարցերից խուսափելու համար), որը միայն մեր հարցից հետո ասաց, որ Փելեշյանի հետ չենք խոսում, այլ՝ նրա վարորդի։

Նարե Գնունի