Վրաստանի նախագահ Սալոմե Զուրաբիշվիլին չի բացառել, որ Վրաստան մուտք գործելու ցանկություն ունեցող ՌԴ քաղաքացիների համար կարող է վիզային ռեժիմ սահմանվել. տեղեկացնում է «Ինտեֆաքս»-ը։
Մոլդովայի նախագահ Մայա Սանդուի հետ ասուլիսի ժամանակ Քիշինևում գտնվող Սալոմե Զուրաբիշվիլին հայտարարել է՝ դեպի Վրաստան ՌԴ քաղաքացիների հոսքն ավելացել է, «այժմ ձեռնարկվող միջոցառումները կարող են բավարար չլինել»։
«Հնարավոր է՝ հարկ լինի քննարկել ՌԴ քաղաքացիների համար վիզային ռեժիմ սահմանելու հարցը, քանի որ այժմ ամեն ինչ բավականին ազատ է։ Այդ որոշումը պետք է կայացնի Վրաստանի կառավարությունը՝ հասարակության հետ»,- ասել է Վրաստանի նախագահը։
Զուրաբիշվիլին ՌԴ քաղաքացիների հոսքը Վրաստան «մարտահրավեր» է որակել։
«ՌԴ քաղաքացիները, որոնք հայտնվել են Վրաստանում, ակնհայտ մարտահրավեր են մեզ համար։ Այժմ Վրաստան են գալիս ինչպես մեր երկրի նախկին քաղաքացիները, այնպես էլ Ռուսաստանի քաղաքացիները։ Սահմանին վերահսկման մեխանիզմներ են կիրառվում, որպեսզի բնակիչների համար վտանգ չլինի»,- ասել է Վրաստանի նախագահը։