ԱՄՆ 20-ից ավելի նահանգների իշխանություններն արգելել են օգտվել TikTok սոցիալական ցանցից՝ աշխատավայրերում եղած սարքերով, տեղեկացնում է CNN-ը։ Ամերիկյան իշխանությունները մտավախություն ունեն, որ նշված սարքերով TikTok-ից օգտվող քաղաքացիների անձնական տվյալները հասանելի կդառնան Չինաստանի իշխանություններին, բացի այդ, ամերիկյան ենթակառուցվածքները կհայտնվեն խոցելի վիճակում։

Որոշ նահանգներում արգելել են օգտվել նաև Չինաստանի հետ առնչվող այլ հավելվածներից, այդ թվում՝ WeChat սոցիալական ցանցից ու AliPay վճարային համակարգից։

ԱՄՆ-ում TikTok-ից օգտվել արգելված է նաև ԱՄՆ Ներկայացուցիչների պալատի աշխատակիցներին։ Աշխատավայրերում առկա սարքավորումների միջոցով սոցցանց մուտք գործելը չափազանց ռիսկային է գնահատվում։

2022 թվականի դեկտեմբերի 16-ին ԱՄՆ կենտրոնական հետախուզական վարչության տնօրեն Վիլյման Բըրնսը հայտարարել է, որ ամերիկյան հետախուզության գնահատմամբ՝ TikTok-ը սպառնալիք է հանդիսանում ԱՄՆ-ի ազգային անվտանգության համար։