Հունվարի 19-ին Երասխում թշնամու դիպուկահարի կրակոցից վիրավորում ստացած 31-ամյա պայմանագրային զինծառայող Ենոք Շահվերդյանի առողջական վիճակը կայուն է, երեկ տեղափոխվել է պալատ։
Այս մասին MediaHub-ի հետ զրույցում ասաց Սուրենավան գյուղի վարչակենտրոնի աշխատազմի առաջին կարգի մասնագետ Մարիամ Հակոբյանը։
«Մենք հարազատների հետ կապի մեջ ենք, քիչ առաջ էլ եմ խոսել, ասում են՝ արդեն իրեն լավ է զգում, դրական դինամիկա կա»,-ասաց Մարիամ Հակոբյանը, հավելելով, որ զինծառայողը դեռևս հիվանդանոցում կմնա, դուրս գրման մասով տեղեկատվություն այս պահին չունեն։
Ենոք Շահվերդյանը ոտքի շրջանում վիրավորում էր ստացել, վիրահատվել է Արարատի բժշկական կենտրոնում։
MediaHub-ն արդեն գրել է, որ Ենոք Շահվերդյանը ավելի քան 5 տարվա պայմանագրային զինծառայող է, նախկինում աշխատել է Ռուսաստանի Դաշնությունում։
Զինծառայողը Սուրենավան գյուղից է, այժմ ընտանիքի՝ կնոջ և երեք երեխաների հետ ապրում է Արարատին կից Զոդ քաղաքում։
Սուրենավան համայնքի ղեկավար Անի Վարդազարյանը MediaHub-ի հետ զրույցում Ենոք Շհավերդյանին բնութագրել էր որպես հայրենասեր, օգնող ու լավ մարդ, ով հանուն հայրենիքի ոչինչ չի խնայի։
Շուշանիկ Միսկարյան