Այս պահին Գյումրիում որևէ աժիոտաժ չկա, մարդիկ հետաքրքրված չեն ընտրություններով: Այս մասին MediaHub-ի հետ զրույցում ասաց ԱԺ «Հայաստան» խմբակցության պատգամավոր Մհեր Մելքոնյանը:
Նրա խոսքով, մարդիկ իրենց անձնական հարցերով, առօրյայով են զբաղված:
«Քաղաքական կուսակցություններն էլ, մեծ հաշվով, ակտիվություն դեռ չեն ցուցաբերում առաջիկա ընտրությունների հետ կապված: Կարծում եմ, որ տոներից հետո կուսակցությունները նոր կակտիվանան, հայտ կներկայացնեն, կմեկնարկեն հանդիպումներն ու խորհրդակցությունները, որպեսզի ուրվագծվի, թե ով ինչ ձևաչափով է գնալու»,- նշեց նա:
Ինչ վերաբերում է «Քաղաքացիական պայմանագիր» կուսակցության շանսերին, որն ամեն ինչ արեց, որպեսզի իշխանափոխություն լինի Գյումրիում, Մելքոնյանը նշեց, որ դժվար է կանխատեսել այդ կուսակցության հաղթանակը Հայաստանի հայրաքաղաքում․ «Բայց հստակ է, որ ՔՊ-ն գործի կդնի բոլոր լծակները՝ թե՛ վարչական, թե՛ իրավապահ համակարգի, թե՛ քրեաօլիգարխիկ, որպեսզի մաքսիմալ քվե պոկեն Գյումրիում»:
Այն, թե ինչպես Փաշինյանի գլխավորած ՔՊ-ն Գյումրիում քաղաքապետի ԺՊ նշանակեց, պատգամավորը շատ վատ է գնահատում՝ որակելով վատ բեմականացում: Ըստ մեր զրուցակցի, Նիկոլ Փաշինյանը իր ոճի մեջ է, հավատարիմ է ինքն իրեն՝ ցույց տվեց, թե, իբր, լավություն է անում գյումրեցիներին, իրենց կարծիքն է հաշվի առնում նշանակելուց առաջ, բայց իրականությունն այլ է։
«Կատարվածը ցույց տվեց, որ 100 հազարանոց քաղաքի ղեկավարի ժամանավոր պաշտոնակատար նշանակվեց մեկը, ով ընդամենը 253 քվե է ստացել, որն էլ իրենց նեղ անձնական շրջապատի ձայներն են: Եվ եթե մեծ մասշտաբի փորձեն անել, հաստատ լրիվ այլ պատկեր կունենանք»,- հավելեց Մհեր Մելքոնյանը:
Հիշեցնենք, նոյեմբերի վերջին Նիկոլ Փաշինյանը հայտարարեց, որ Գյումրիի քաղաքապետի ԺՊ ընտրելու համար «փրայմերիզ» կանցկացվի։
Փաշինյանը հայտարարել էր, որ ով հաղթի նախնական ընտրություններում, նա էլ կլինի քաղաքապետի ՔՊ-ի թեկնածուն Գյումրիի ավագանու արտահերթ ընտրություններում, որոնք, ըստ MediaHub-ի տեղեկությունների, տեղի կունենան մարտի 30-ին: ՔՊ-ամերձ «փրայմերիզի» արդյունքներով Գյումրու քաղաքապետի ԺՊ նշանակվեց անկուսակցական Սարիկ Մինասյանը, որը օրեր անց ՔՊ-ին անդամակցելու դիմում ներկայացրեց: