Քաղաքապետ Հրաչյա Սարգսյանն ինքն է որոշել, որ պետք է ինձ բուժող բժիշկներին շնորհակալագիր հանձնի, քանի որ անասելի բարդ վիրահատություն են կատարել։ Քաղաքապետն էլ պարզապես իր թիմակցի կյանքը փրկելու համար այսպիսի վերաբերմունք է ցույց տվել։ Այս մասին MediaHub.am-ի հետ զրույցում ասաց Երևանի ավագանու «Իմ քայլը» խմբակցության անդամ Արման Անտոնյանը՝ մեկնաբանելով մամուլում շրջանառվող լուրերը։

Հիշեցնենք, որ ըստ մամուլի՝ Երեւանի քաղաքապետ Հրաչյա Սարգսյանը շնորհակալագիր է հանձնել ավագանու իշխող «Իմ քայլը» խմբակցության անդամ Արման Անտոնյանի դեմ կատարված մահափորձից հետո նրան օգնած 2 բժիշկներին՝ Ռ. Հարությունյանի անվան «Աբովյանի բժշկական կենտրոն» ՓԲԸ-ի վիրաբուժական բաժանմունքի պետ, ավագ վիրաբույժ Սերժ Խաչատուրյանին և Երեւանի Մ. Հերացու անվան պետական բժշկական համալսարանի կրծքային վիրաբուժության ամբիոնի դոցենտ, բժշկական գիտությունների թեկնածու, «Միքայելյան» համալսարանական հիվանդանոցի ընդհանուր և կրծքային վիրաբույժ Մկրտիչ Մկրտչյանին: 

Կան մեկնաբանություններ, թե Անտոնյանն ինքն է «պայքարել», որ իրեն բուժող բժիշկները շնորհակալագիր ստանան.

«Չգիտեմ, թե ինչու են նման բամբասանքներ տարածվում ու ովքեր են տարածողները։ Ամեն դեպքում, ես քաղաքապետին ոչինչ չեմ առաջարկել, ոչինչ չեմ պարտադրել այս մասով։ Բժիշկները, երբ ինձ վիրահատում էին, չգիտեին, թե ով է վիրահատական սեղանին պառկած, իրենք իրենց գործն են արել, չեն նայել ավագանու անդամ է, թե բանվոր կամ այլ մասնագետ։ Դանակի 11 հարված է հասցվել, հրաշքով են կյանքս փրկել»,-ասաց նա և հավելեց, որ այս խոսակցությունները պարզապես չար մարդկանց հերյուրանքներ են։ 

Լիաննա Թորոսյան