Պաշտոնական Բաքուն մտադիր է «համարժեք արձագանքել» Եվրոպայի խորհրդի խորհրդարանական վեհաժողովի (ԵԽԽՎ) որոշմանը, որի համաձայն՝ չէին հաստատվել ադրբեջանական պատվիրակության լիազորությունները։
Չնայած այն հանգամանքին, որ ԵԽԽՎ երեկվա նիստում նշվել է, որ ադրբեջանական պատվիրակության լիազորությունների սահմանափակումը չի նշանակում Ադրբեջանի մասնակցության դադարեցում Եվրոպայի խորհրդի այլ կառույցներում, Բաքվի դիրքորոշումն այլ է։
Ըստ APA-ի՝ Ադրբեջանը մտադիր չէ համակերպվել այս «անարդար և կողմնակալ վերաբերմունքի» հետ, և տեղի իշխանությունները ներկայումս քննարկում են ոչ միայն ԵԽԽՎ-ից, այլև ամբողջությամբ Եվրախորհրդից դուրս գալու ընթացակարգը։
Ադրբեջանը կարող է նաև հրաժարվել Մարդու իրավունքների եվրոպական դատարանի (ՄԻԵԴ) իրավասության ճանաչումից։
Ադրբեջանական պատվիրակությունը անցյալ չորեքշաբթի լքել էր ԵԽԽՎ նիստերի դահլիճը Ֆրանսիայի Ստրասբուրգում՝ հայտարարելով, որ դադարեցնում է համագործակցությունը վեհաժողովի հետ՝ ի նշան «Բաքվի հետ կապված երկակի ստանդարտների» անհամաձայնության։