Թուրքիայում ծայրահեղական «Ազգայնական շարժում» կուսակցության առաջնորդ Դևլեթ Բահչելին անդրադարձել է ՈՒԵՖԱ-ի` Թուրքիայի ֆուտբոլի ազգային հավաքականի ընտրանու պաշտպան Մերիհ Դեմիրալի նկատմամբ սկսված հետաքննությանը։
Բահչելիին սոցցանցում կատարած գրառմամբ դատապարտել է ՈՒԵՖԱ-ի կողմից կայացված նման որոշումը՝ այն որակելով «ծայրաստիճան կողմնակալ ու սխալ»:
«Ազգայնական շարժում»-ը Թուրքիայում իշխող «Արդարություն և զարգացում» կուսակցության հետ «Ժողովուրդ» (Cumhur) դաշինքի մեջ է։
Հայտնի է դարձել նաև, որ այս ժեստի պատճառով Գերմանիայի ԱԳՆ է կանչվել Բեռլինում Թուրքիայի դեսպանը։
Դեմիրալը երկու գոլ էր խփել «Եվրո»-ի 1/8 եզրափակչի՝ Ավստրիայի դեմ խաղում։ Դեմիրալը խփած գոլերից մեկը տոնել էր ծայրահեղ ազգայնական «Գորշ գայլեր» կազմակերպության ժեստով։
Թուրքիայում «Գորշ գայլեր»-ին ներկայացնում է ծայրահեղ «Ազգայնական շարժում» կուսակցությունը (MHP): Գերմանիայում այն, դրա ժեստն արգելված չեն, սակայն Սահմանադրության պաշտպանության դաշնային գրասենյակի հսկողության ներքո են։