Ըմբշամարտի միջազգային ֆեդերացիան (UWW) Փարիզի Օլիմպիական խաղերից առաջ հրապարակել է համաշխարհային վարկանիշային միավորների նոր աղյուսակը:

Ազատ ըմբշամարտի ցանկում Հայաստանի հավաքականի անդամ Արսեն Հարությունյանը (57 կգ) 41 000 միավորով 3-դն է, Վազգեն Թևանյանը (65 կգ) և Արման Անդրեասյանն (70 կգ) ունեն համապատասխանաբար 52 500 և 54 000 միավոր և իրենց քաշային կարգերի առաջին և երկրորդ հորիզոնականում են:

Հունահռոմեական ըմբիշ Արթուր Ալեքսանյանը (97 կգ) 52 000 միավորով աղյուսակում առաջինն է:

Սլավիկ Գալստյանն (67 կգ, 35 000 միավոր) ու Մալխաս Ամոյանը (77 կգ, 46 000 միավոր) չորրորդն են իրենց քաշային կարգերում:

Գևորգ Ղարիբյանն (60 կգ, 34 400 միավոր) ու Հրաչյա Պողոսյանը (63 կգ, 33 100 միավոր) զբաղեցնում են համապատասխանաբար 5-րդ ու 6-րդ հորիզոնականները: