Արևմտյան Ղազախստանի շրջանում վթարի ենթարկված անօդաչու թռչող սարք է հայտնաբերվել, իչպես հայտնում է Orda.kz-ն՝ վկայակոչելով իրավապահ մարմինների ներկայացուցիչների և Բոկեյորդինսկի շրջանի ակիմի Նուրլիբեկ Դաումովի հայտարարությունը, միջադեպը տեղի է ունեցել Ույալի գյուղի մոտ։
«ԱԹՍ-ի նմանվող օբյեկտի հայտնաբերման կապակցությամբ ոստիկանության մարզային վարչությունը մասնագիտացված ծառայությունների հետ համատեղ օպերատիվ աշխատանքներ է իրականացնում»,- պարզաբանել են վարչությունից։
Ույալի գյուղը գտնվում է Ռուսաստանի Վոլգոգրադ, Աստրախան և Սարատով քաղաքներից մոտավորապես 300 կմ հեռավորության վրա։ Բնակավայրից 250 կմ հեռավորության վրա է գտնվում ռուսական ռազմական փորձադաշտը՝ Կապուստին Յարը, որը հայտնի է բալիստիկ հրթիռների փորձարկումներով։
Նշվում է, որ հայտնաբերված անօդաչու թռչող սարքի երկարությունը 120 սմ է, իսկ արտաքին տեսքը համապատասխանում է ֆրանսիական Sagem ընկերության կողմից արտադրված Crecerelle հետախուզական անօդաչու թռչող սարքի բնութագրերին։ Հայտնաբերված սարքը հանձնվել է Ղազախստանի զինվորականներին և ներկայումս գտնվում է Արևմտյան Ղազախստանի շրջանի վարչական կենտրոնում՝ Ուրալսկում։