Անհարմար եմ զգում, որ ՀՀ ԶՈՒ-ն այս վիճակում է, բայց իսկապես, եթե ասեմ, որ բարձիթողի վիճակ է, սխալված չեմ լինի։ Այս մասին այսօր MediaHub.am-ի հետ զրույցում ասաց ռազմական փորձագետ Վան Համբարձումյանը՝ խոսելով վերջին շրջանում ոչ մարտական զոհերի թվի մասին։
Հիշեցնենք, որ միայն այս ամսվա սկզբում՝ մինչև օգոստոսի 15-ը, ոչ մարտական 5 զոհ ենք ունեցել։ Վան Համբարձումյանի խոսքով՝ վիճակն իրականում մտահոգիչ է։ «Երբ փորձում են բացատրել, որ մարտական պայմաններում որոշ քանակի զոհեր ունենալը նորմալ է, ուզում եմ հակադարձել, քանի որ նորմալ է, երբ զոհ ես տալիս պատշաճ չզինվելու, պատրաստված չլինելու, օդը չպաշտպանելու արդյունքում։ Եթե փորձենք ինքներս մեզ համոզել, սա գուցե հասկանալի դառնա, քանի որ գործ ունենք բավականին զարգացած Զինված ուժերի հետ, որը մեր թշնամին ունի, նրանց և՛ սպառազինությունն է լավը, և՛ մնացյալ պատրաստվածությունը, բայց նույնիսկ մարտական զոհեր ենք ունենում մեր մարտական անփութության արդյունքում, վատն այն է, որ պատերազմից հետո դասեր չենք քաղել և տուժում ենք հենց մեր ձեռքով»։
Անդրադառնալով ոչ մարտական պայմաններում զոհեր ունենալու փաստին՝ վերջինս ցավով նշեց, որ դիրքերում, զորամասերում զինծառայողները առաջին բուժօգնությանը, ինչպես հարկն է, չեն ծանոթանում, զինծառայողների համար որոշ չափով խորթ է նաև հոգեբանական պատրաստությունները։
Փորձագետը հիշեցրեց նաև այն դեպքը, երբ զինծառայողը մահացել է հրդեհը ժամանակին չհանգցնելու պատճառով։ «Ինչո՞ւ կրակմարիչներ չեն եղել, ինչո՞ւ ռազմական ոստիկանությունը ստուգում չի արել և արձանագրել, որ պարտադիր վայրերում կրակմարիչներ չկան, եթե անգամ արձանագրվել են, ինչո՞ւ չեն տեղադրվել։ Սուրեն Պապիկյանի նշանակումը, երբ քննադատում էինք, ընդդիմացողներ կային, հիմա այդ ընդդիմանալը չի արդարացվում, այդ մարդ իսկապես ՊՆ-ի հետ կապ չունի»։
Ըստ Համբարձումյանի՝ եղել են դեպքեր, որ նույնիսկ զինծառայողը չի հասկացել, թե դեղատուփի մեջ եղած դեղերից որը ինչի համար է նախատեսված, և սա այն պատճառներից մեկն է, երբ զինծառայողը չի կարողանում ընկերոջն օգնել։ Նա շեշտեց, որ ժամանակն է՝ Կառավարությունն իր սխալների վրա սովորի ու այլևս ողբերգական ելքով պատահարներ թույլ չտա ԶՈՒ-ում։