«Հյուսիսային հոսք» գազատարի միջոցով մատակարարումների դադարեցման հետ կապված իրավիճակը «շատ լուրջ է»։ Коммерсантъ պարբերականի փոխանցմամբ, այս մասին ասել է Եվրահանձնաժողովի խոսնակ Թիմ Մաքֆին: Նա հույս է հայտնել, որ տեխնիկական աշխատանքներից հետո հումքի մատակարարումը կվերսկսվի։
Այսօր առավոտյան «Գազպրոմը» վերանորոգման աշխատանքների պատճառով դադարեցրել է գազի մատակարարումը «Հյուսիսային հոսք» գազատարով։
Միևնույն ժամանակ Կանադան որոշել է վերադարձնել Siemens տուրբինը, որն այնտեղ էր գտնվում տեխնիկական սպասարկման համար։ Եվրահանձնաժողովի ներկայացուցիչը գտնում է, որ տուրբինը վերադարձնելով՝ Կանադան չի խախտում Եվրամիության պատժամիջոցները։
«Տուրբինի վերադարձը վերացնում է այն պատրվակներից մեկը, որը Ռուսաստանն օգտագործում էր մատակարարումները դադարեցնելու համար։ Կանադայի կողմից տուրբինի վերադարձը չի խախտում ԵՄ պատժամիջոցները, քանի որ դրանք չեն վերաբերում գազի տարանցման սարքավորումներին», – ասել է Մաքֆին:
Հունիսի 14-ին Коммерсантъ-ը գրել էր, որ «Հյուսիսային հոսքի» տուրբինը չեն կարող Գերմանիա ուղարկել Կանադայից։ Հաջորդ օրը «Գազպրոմը» դադարեցրել էր «Հյուսիսային հոսքի» ևս մեկ տուրբինի աշխատանքը։ Արդյունքում գազատարով գազի մղումը օրական 167 մլն խորանարդ մետրից նվազել է մինչև 67 մլն խորանարդ մետր: Հուլիսի 10-ին Կանադան թույլ է տվել տուրբինն ուղարկել Եվրոպա, սակայն խողովակաշարի աշխատանքը դադարեցվել է առնվազն մինչև հուլիսի 21-ը՝ վերանորոգման պատճառով։