«Սիրելի Տարոն, իմ հարազատ, իմ հայրենակից, իմ արյունակից, իմ եղբայր, իմ որդի, իմ քրոջ որդի, իմ եղբոր որդի, իմ հերոս: Դու գիտես, դու չես կարող չիմանալ, թե ես քանի անգամ եմ դիտել տեսանյութը եւ ինչպես եմ փորձել հայտնվել քո մարմնում, քո մտքում, քո գլխում: Ինչպես եմ ձգտել լինել «դու» եւ զգալ այն ամենը, որ դու զգում ես քո կյանքի վերջին րոպեների ընթացքում...»:

Այս տողերի հեղինակը Նիկոլ Փաշինյանի կինն է՝ Աննա Հակոբյանը: Օրերս էր գրառում արել 2020 թվականի 44-օրյա պատերազմի հերոս Տարոն Անդրեասյանի սխրանքների մասին: Օրեր անց նա այցելեց Անդրեասյանի հայրական տունը Մխչյանում. այցի մասին փաստող տեսանյութում Հակոբյանն ու ծնողները ջերմ ու երկարատև գրկախառվում են, հուզվում, արտասվում… Աննա Հակոբյանը քիչ առաջ այցի արդյունքների մասին հերթական գրառումն է արել.

«Մեծ պատիվ էր ինձ համար Արարատի մարզի Մխչյան համայնքում գտնվող Անդրեասյանների օջախում հյուրընկալվելը: Ամենաիսկական հայկական օջախ, որտեղ ծնվել, մեծացել, ու դաստիարակվել է Տարոն Անդրեասյանը։ Այս ընտանիքում է ձեւավորվել հայ տղամարդու՝ եզակի հանդիպող այն տեսակը, որով մի քանի միլիոնն այդքա՜ն հպարտանում է՝ նրբորեն, բայց միեւնույն ժամանակ չհիմնավորված «առատաձեռնությամբ» սեփական անձն էլ տեսակի բաժնետեր դարձնելով։

-Մամ, էդքան տխուր ա հա՞ վիճակը, էդ կռվող չկա՞, որ արդեն ննջարաններ են հասնում… Ես գալիս եմ։ Այսքանն է Տարոնը հեռախոսով ասել իր մայրիկին 2020 թվականի հոկտեմբերի 3-ին։ Հոկտեմբերի 4-ին ՌԴ-ից ժամանել է Հայաստան, հոկտեմբերի 5-ին գնացել է Պաշտպանության նախարարություն եւ կամավորագրվել հայրենիքի պաշտպանությանը։ Մնացածը՝ գիտեք։

Հ.Գ. Գիտեմ, որ Տարոնը պատերազմի ժամանակ Հայաստան վերադարձած եւ առհասարակ կամավորությամբ հայրենիքի պաշտպանության՝ մահացու վտանգավոր գործը ստանձնած միակ հայ տղամարդը չէ։ Բայց թե քանի հոգի են նրանք՝ չգիտեմ։ Պետական գաղտնիք կլինի դա»,- գրել է նա:

Ինչո՞ւ է Աննա Հակոբյանն ընտրել հենց Տարոն Անդրեասյանին ու նրա ընտանիքը, ինչո՞ւ է այս էլ երկրորդ անգամ նրան գրառում նվիրում, գնում հենց Տարոնի տուն: Գուցե այն պատճառով, որ զոհերի ու անհետ կորած համարվող զինծառայողների ծնողների գերակշիռ մեծամասնությունը հենց նրան ու իր ամուսնուն են մեղադրում պատերազմի նման ավարտի մեջ, իրենց որդիներին կորցնելու համար: Ամեն անգամ Եռաբլուրում հիշատակում ու ինչու չէ՝ անիծում մեղավորներին.... թեպետ, մոռացել էինք՝ Աննա Հակոբյանը այս երկու տարվա ընթացքում ընդամենը երկու անգամ է եղել Եռաբլուրում, ինչի մասին անձամբ է խոստովանել:

Բայց, վստահ ենք, հստակ գիտի, թե ո՞ր զոհվածի տուն կարող է գնալ, որի ծնողի հետ գրկախառնվել ու որ ծնողներից, հակառակը, խուսափել: Ասել է թե՝ Եռաբլուր չի գնում, բայց Եռաբլուրը հավերժ իրեն հետապնդելու է...