Ինչպես արդեն գրել ենք, վերջին օրերի ներքաղաքական ինտրիգը պտտվում է այս հարցի շուրջ՝ ո՞վ կդառնա արդարադատության նոր նախարարը: MediaHub-ը բազմիցս է անդրադարձել այս հարցին ու դաշտում առկա քննարկումներին: Ներկայացրել ենք բոլոր այն անունները, որոնք մամուլը քննարկում է որպես հավանական թեկնածուներ:
Այդպես, երեկ մեզ լուրեր հասան Աննա Վարդապետյանի անվան շուրջ քննարկումներից, սակայն MediaHub-ը հակված է նրան, որ Փաշինյանը այս տարբերակից կհրաժարվի:
Ուշագրավն այն է, որ քննարկումներում ամենից շատ շրջանառվում են կանանց անուններ՝ ՆԳ նախարարի տեղակալ Արփինե Սարգսյան, ՔՊ-ական պատգամավորներ Արփի Դավոյան, Արուսյակ Ջուլհակյան և այլն: Եվ ահա այսօր MediaHub-ը նոր անուն լսեց, որ ևս քննարկվում, և եթե հետագիծն այս կնոջ նայենք, ապա շատ հավանական է, որ հենց այս տարբերակի վրա էլ Նիկոլ Փաշինյանը կանգ առնի:
Մեր աղբյուրը փոխանցում է, որ բավականին ակտիվ քննարկվում է ՔՊ-ական պատգամավոր Արուսյակ Մանավազյանի անունը: Իսկ ինչո՞ւ ինքը:
Նախքան 2016 թվականին ՔՊ անդամ դառնալը Մանավազյանը 15 տարի աշխատել է «Հայկական ժամանակ» օրաթերթում՝ սկզբում եղել է ֆինանսական մասի պատասխանատու, հետո՝ տնօրեն։ 2018- 2021թթ.՝ «Քաղաքացիական պայմանագիր» վերադարձի հիմնադրամի հաշվապահն է եղել, իսկ 2019-2020թթ.՝ «Կոնդի առանձնատների տնտեսություն» ՊՈԱԿ գլխավոր հաշվապահ, ապա նաև ՊՈԱԿ տնօրենի լիազորությունները կատարող: 2021-ի խորհրդարանական ընտրություններից հետո Մանավազյանն ԱԺ պատգամավոր է:
Այսքանը լիովին բավարար է հասկանալու համար, որ Փաշինյանը վստահում է Մանավազյանին և բազմաթիվ այլ շրջանառվող անունների կողքին թերևս ամենից մեծ շանսերը նա կարող է ունենալ:
MediaHub-ը փորձեց կապ հաստատել Արուսյակ Մանավազյանի հետ՝ ճշտելու մեր ունեցած տեղեկությունը, սակայն վերջինս, ծանոթանալով հարցին, այն թողեց անպատասխան: