NEWS.am-ը տեղեկացել է, որ Կոտայքի մարզի Արզական գյուղում օգոստոսի 27-ին 35-ամյա կնոջը սպանած եւ 2 անձի դանակահարած, 3 օր անց Բալահովիտ գյուղում եւս մեկ անձի սպանության մեջ մեղադրվող 46-ամյա Զորիկ Մելքոնյանը շարունակում է հետախուզման մեջ գտնվել։

Հիշեցնենք, որ Կոտայքի մարզում օգոստոսի 27-ին՝ ժամը 05։10-ի սահմաններում ահազանգ էր ստացվել, որ «պարանոցի եւ որովայնի բազմակի ծակած-կտրած վերքեր, հեմոռագիկ շոկ» ախտորոշմամբ հիվանդանոց է տեղափոխվել մի քաղաքացի, իսկ կարճ ժամանակ անց «աջ նախաբազկի վերին երրորդի ծակած-կտրած վերք» ախտորոշմամբ հիվանդանոց է տեղափոխվել մեկ այլ քաղաքացի։

Պարզվել է, որ վիրավորներն Արզական գյուղի բնակիչ՝ 57-ամյա Ավետիք Ա-ն է եւ 53-ամյա Անահիտ Ա-ն։ Ըստ տեղեկությունների՝ նույն օրը, ժամը 03։30-ի սահմաններում Կոտայքի մարզի բնակիչ՝ 46-ամյա Զորիկ Մելքոնյանը մտել է վիրավորների ննջասենյակ եւ անհայտ պատճառներով ծեծի ենթարկել Ավետիք Ա-ին եւ Անահիտ Ա-ին, դանակով հարվածել աջ արմնկային հատվածին, ապա դանակի մի քանի հարվածներ հասցրել Ավետիք Ա-ի մարմնի տարբեր մասերին։ Ոստիկաններն այցելել էին Զորիկ Մ.–ի տուն, որտեղ ննջասենյակի մահճակալի վրա հայտնաբերվել է պարանոցը մասամբ կտրած կնոջ դի։

Մենք տեղեկացանք, որ դեպքից 3 օր անց նա գնացել է Բալահովիտ գյուղ եւ սպանել 34-ամյա Սոս Գեւորգյանին, դանակահարել 32-ամյա Արթուր Մանուկյանին։

Դեպքի առթիվ նախաձեռնվել է քրեական վարույթ՝ ՀՀ ՔՕ 44-155-րդ հոդվածի 1-ին մասով (Սպանության փորձ) եւ 207-րդ հոդվածի 1-ին մասով (Բնակարանի անձեռնմխելիությունը խախտելը), 155-րդ հոդվածի 2-րդ մասի 9-րդ կետով (Սպանություն`մերձավոր ազգականի կողմից), որը միացվել է վերոնշյալ քրեական վարույթին։

Իրավապահները Զորիկ Մելքոնյանին դեռ չեն հայտնաբերել։