Սիսիանի նորընտիր համայնքապետ Արմեն Հակոբջանյանի երդման արարողությունը նախատեսված էր շաբաթ օրը, սակայն ժամը 11։00-ին հրավիրված ավագանու արտահերթ նիստը տեղի չի ունեցել։ Նիստին ներկա են եղել միայն «Քաղաքացիական պայմանագիր» կուսակցության անդամները։ Սիսիան համայնքի ավագանու մանդատ ստացած մյուս չորս կուսակցությունները նախորդ օրերին հայտարարություն էին տարածել, որ հրաժարվում են մանդատներից։
Այսպիսով, չնայած հոկտեմբերի 12-ին, կրկնակի քվեարկություն կազմակերպելուց հետո ավագանու անդամներից 9-ի քվեով Արմեն Հակոբջանյանն ընտրվել էր համայնքի ղեկավար, սակայն նրան չհաջողվեց համայնքապետի պաշտոնն ստանձնել։
Սիսիանում ստեղծված պատկերը շատ նման է նրան, ինչ ամիսներ առաջ ստեղծվել էր Թալինում:
Կարճ ասած, իշխանության կուսակցությանը չի հաջողվում ընտրություններում համոզիչ հաղթանակ տանել, ավագանու անդրանիկ նիստում ՔՊ-ն կարողանում է մանդատագողությամբ համայնքի ղեկավար ընտրել, բայց հաղթանակը պահել չի կարողանում, որովհետև մյուս ուժերը խափանում են ավագանու աշխատանքները:
Հիմա շատերը կասեն՝ հետո ի՞նչ, նույն Թալինում իշխանությունները նոր ընտրությունների գնացին ու համոզիչ հաղթանակ տարան: Դժվար է առարկելը, մանավանդ, որ օրենքն իշխանություններն այնպես են «խմբագրել», որ քսան օր անց Նիկոլ Փաշինյանը յուրային մեկին համայնքապետի ԺՊ կնշանակի՝ նրա վրա դնելով արտահերթ ընտրությունները «ճիշտ» կազմակերպելու «առաքելությունը»:
Այնուամենայնիվ, Սիսիանում տեղի ունեցածն ավելի գլոբալ հետևանք ունի՝ դա այն է, որ իշխանություններն այլևս չունեն հանրային վստահության պաշար ու տարբեր համայնքներում պարտվում են, իսկ որոշ տեղերում հաղթանակը նրանց տրվում է՝ օրենսդրական «կռուտիտների» շնորհիվ:
Թալինում դա հաջողվեց, Սիսիանում շատ հնարավոր է՝ նույնիսկ դա չփրկի ՔՊ-ին:
Վահրամ Բագրատյան