Այս պահին Խարկովում ամենամեծ խնդիրը հոսանքն է, լույս չկա։ Գրեթե ամեն օր հովհարային անջատումներ են լինում ու երկար ժամանակով։ Այս մասին այսօր MediaHub.am-ին պատմեց Խարկովում ՀՀ պատվավոր հյուպատոսի օգնական Համլետ Հովհաննիսյանը՝ ներկայացնելով պատերազմի ֆոնին Ուկրաինայի ու հայ համայնքի վիճակը։

«Երկու օր առաջ 24 ժամով Խարկովում և այլ քաղաքներում լույս չկար։ Հիմա թե՛ հայ համայնքը, թե՛ ուկրաինացիներն ադապտացվել են պատերազմական պայմաններին։ Շատ ընտանիքներ, նույնիսկ Հայաստանից և Եվրոպայից Խարկով են վերադարձել»,-ասաց նա։

Հովհաննիսյանի փոխանցմամբ՝ գազի մատակարարման եւ սննդի հետ կապված հիմնականում խնդիրներ չկան։

«Այժմ Ուկրաինայի վերահսկողության տակ գտնվող քաղաքների միջև տրանսպորտային հաղորդակցությունը խնդիր չունի։ Երկաթգիծը, ավտոբուսներն աշխատում են»,-մանրամասնեց Հովհաննիսյանը։

Հյուպատոսի օգնականը հայտնեց նաև, որ զոհերի թվում հայերը շատ են։ «Մի քանի օր առաջ ազգությամբ հայ բարձրաստիճան սպա զոհվեց։ Բնակչությունը տներում են, բայց քաղաքապետարանի կողմից կացարաններ են ստեղծվել, որտեղ մարդիկ գալիս են այն ժամանակ, երբ տներում հոսանք չկա, գալիս են սնվելու, տաքանալու համար»։

Հիշեցնենք, որ Ուկրաինայի նախագահ Վլադիմիր Զելենսկին հայտնել է, որ երկրում ավելի քան 6 միլիոն բաժանորդ մնացել է առանց հոսանքի։

Լիաննա Թորոսյան