«Ժողովուրդ» օրաթերթը գրում է.

«Ժողովուրդ» օրաթերթի տեղեկություններով՝ ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանի եւ Տիգրանյան փողոցում կարտոֆիլ վաճառող Արթուր Հակոբյանի միջեւ տեղի ունեցած միջադեպի գործը կարճվեց։ Այսինքն՝ իշխանական պատգամավորի մասնակցությամբ տեղի ունեցած խուլիգանական արարքը չքննվեց, եւ պատգամավոր Աղազարյանը չպատժվեց իր խուլիգանական վարքի համար։

«Ժողովուրդ» օրաթերթի հետ զրույցում ՀՀ քննչական կոմիտեի խոսնակ Գոռ Աբրահամյանը հաստատեց տեղեկությունը՝ նշելով. «Վարույթն իրականացնող մարմնի որոշմամբ քրեական վարույթը կարճվել է՝ հանցակազմի բացակայության հիմքով։ Որոշման օրինականությունը ստուգվել է դատախազության կողմից»։

«Ժողովուրդ» օրաթերթը դեռեւս ամիսներ առաջ գրել էր, որ այս գործը կկարճվի, քանի որ այդպես է ցույց տալիս ընթացքը ու նաեւ քաղաքական հրահանգը: Բանն այն է, որ կարտոֆիլ վաճառող Արթուր Հակոբյանը միջադեպից հետո որպես կասկածյալ ձերբակալվել էր ու կարճ ժամանակ անց ազատ արձակվել:

Իրավապահները լսել էին նաեւ պատգամավոր Աղազարյանին, ու մինչ օրս գործով այլ քննչական գործողություններ չեն կատարվել, քրեական գործով չկա մեղադրյալ, Արթուր Հակոբյանի նկատմամբ էլ քրեական հետապնդում չի իրականացվել: Դատելով իրավիճակից՝ իրավապահները հասարակական բուռն արձագանքից հասկացան, որ ՔՊ-ական պատգամավոր Աղազարյանը, մեղմ ասած, սարքել էր վաճառական քաղաքացու գլխին, եւ այլընտրանք չունեն, քան քրեական գործը կարճելը:

Վերջնարդյունքում քաղաքացու գլխին սարքած, խուլիգանական վարք դրսեւորած պատգամավորը մնաց անպատիժ. ընտրովի արդարադատության հերթական դրսեւորումը։

Հիշեցնենք, որ պատգամավորը մարտի 3-ին աշխատանքի գնալու ճանապարհին՝ Տիգրանյան հասցեում, կարտոֆիլի վաճառքով զբաղվող Հակոբյանի հետ վեճ էր ունեցել, ոտքով հարվածել առեւտրականի կարտոֆիլի պարկերին ու երկու պարկ թափել փողոցում: Միջադեպի պատճառը «կարտոֆիլների փողոց» անունով հայտնի փողոցում կարտոֆիլ վաճառելն է եղել, որը դուր չէր եկել Աղազարյանին:

«Փաստ» օրաթերթը գրում է

Մեր ունեցած տեղեկություններով, առաջիկա օրերին կհայտարարվի նոր շարժման ստեղծման մասին: Ամենայն հավանականությամբ, այս շաբաթվա ընթացքում դրա մասին կհայտարարի Հայաստանի Հանրապետության մարդու իրավունքների նախկին պաշտպան Արման Թաթոյանը: Մեր աղբյուրները փոխանցում են, որ նա հատկապես վերջին շրջանում ակտիվ հանդիպումների ու քննարկումների մեջ է:

«Փաստ» թերթի տեղեկություններով, հնարավոր է, որ Արման Թաթոյանը նաև հայտարարի սեպտեմբերին կայանալիք Երևանի ավագանու ընտրություններին մասնակցելու մասին, ինչը կարող է էլ ավելի սրել առանց այդ էլ սպասելի բավական թեժ ու սուր ընտրապայքարը՝ հաշվի առնելով այս պահին հայտնի, ինչպես նաև սպասվող թեկնածուների մասնակցությունը: Երեկ օրվա ընթացքում փորձեցինք տեղեկությունը ճշտել Արման Թաթոյանից, սակայն նրա հետ կապ հաստատել չհաջողվեց:

«Ժողովուրդ» օրաթերթը գրում է.

«Ժողովուրդ» օրաթերթը ՔՊ-ի պաշտոնական կայքում հրապարակված լուսանկարներում նկատեց, որ կուսակցական-քաղաքական ժողովին ներկա են եղել ոչ միայն պատգամավորները, ՔՊ-ական մարզպետները, այլ նաեւ գործադիրը՝ իր ողջ կազմով:

Բացի ՔՊ անդամ նախարարներ Սուրեն Պապիկյանից, Արարատ Միրզոյանից, Վահե Հովհաննիսյանից, Գնել Սանոսյանից, Հակոբ Սիմիդյանից եւ Արմեն Փամբուխչյանից, ՔՊ քաղաքական ժողովին մասնակցում էին նաեւ առողջապահության նախարար Անահիտ Ավանեսյանը, աշխատանքի եւ սոցիալական հարցերի նախարար Նարեկ Մկրտչյանը, էկոնոմիկայի նախարար Վահան Քերոբյանը, ԲՏԱ նախարար Ռոբերտ Խաչատրյանը, արդարադատության նախարար Գրիգոր Մինասյանը, ԿԳՄՍ նախարար Ժաննա Անդրեասյանը, որոնք ՔՊ անդամ չեն:

Ենթադրվում է, որ կուսակցական հարցերը պետք է որ նրանց չառնչվեին, բայց, արի ու տես, ոչ կուսակցական նախարարները եւս ակտիվորեն նեգրավված են ներկուսակցական աշխատանքներում:

«Ժողովուրդ» օրաթերթը գրել էր, որ քաղաքական ժողովի օրակարգում հիմնականում ներկուսակցական հարցեր են եղել եւ ավագանու առաջիկա ընտրություններին մասնակցության հարցեր: Հավանաբար, ՔՊ-ում այնքան մարտական են տրամադրված, որ որոշել են ռեսուրս չխնայել ու իրենց թեկնածուի քարոզարշավի աշխատանքներում ներգրավել, օրինակ, ոչ ՔՊ անդամ Անահիտ Ավանեսյանին կամ Վահան Քերոբյանին:

«Ժողովուրդ» օրաթերթի աչքից չվրիպեց նաեւ, որ ՔՊ քաղաքական ժողովին մասնակցում են նաեւ փոխվարչապետներ Տիգրան Խաչատրյանը եւ Մհեր Գրիգորյանը:

«Ժողովուրդ» օրաթերթը ՔՊ վարչության փոխնախագահ Գեւորգ Պապոյանից հետաքրքրվեց՝ ինչու են անկուսակցական փոխվարչապետները մասնակցել կուսակցության քաղաքական ժողովին, ինչ առնչություն ունեն նրանք ներկուսակցական հարցերի հետ։

«Մեր կանոնադրության համաձայն՝ քաղաքական ժողովին մասնակցում են կոնկրետ մարդիկ. կան պաշտոններ, որոնց համապատասխանող անձինք մասնակցում են ժողովին, եւ կան հրավիրյալներ, որոնց որոշում է կուսակցության վարչությունը: Այս պարագայում պարոն Գրիգորյանը եւ պարոն Խաչատրյանը քաղաքական ժողովին մասնակցել են որպես հրավիրյալներ: Կարծում եմ՝ հարց չպետք է առաջանա, քանի որ նրանք երկուսն էլ քաղաքական պաշտոններ են զբաղեցնում ու կարող էին հրավիրվել: Քաղաքական ժողովին բոլոր հրավիրվածները քաղաքական պաշտոն են զբաղեցնում»,-ասաց Պապոյանը:

«Ժողովուրդ» օրաթերթը գրում է.

2022 թվականի մարտի 13-ին երդում տված եւ Հայաստանի Հանրապետության նախագահ դարձած Վահագն Խաչատուրյանն իրեն պատկանող անշարժ գույքերը կա՛մ նվիրատվություն է ստացել, կա՛մ ժառանգել։ Օրինակ՝ 2002 թվականին նա նվիրատվություն է ստացել Երեւանի Կենտրոնում գտնվող բնակարան եւ ավտոտնակ, իսկ 2017 թվականին էլ երկու հողամաս է ժառանգություն ստացել, որոնցից մեկը՝ Արաբկիրում, մեկը՝ Ձորաղբյուրում։

Նվիրատուների ցանկը, կամ թե ումից է ժառանգություն ստացել հողամասերը, նշված չեն։ Հաշվետու տարում բանկային հաշվին, առանց ավանդների, նախագահն ունեցել է 5 մլն 540 հազար դրամ, 23 մլն դրամ, 1 մլն դրամ, 267 եվրո եւ 163 դոլար։ Որպես կանխիկ դրամ նա տարվա վերջին հայտարարագրել է 15 հազար դոլար եւ 800 հազար դրամ գումար։

Մեկ տարում Խաչատուրյանը վաստակել է 15 մլն դրամ, որից 170 հազար դրամը եղել ԵՊՀ-ից՝ աշխատանքի վարձատրություն, 9 մլն 926 հազար դրամը՝ աշխատանքի վարձատրություն որպես ՀՀ նախագահ, 4 մլն 630 հազար դրամը եղել է նրա՝ ԲՏԱ նախարար ժամանակ եղած եկամուտը, 400 հազար դրամ՝ կրկին աշխատավարձ «Անտարես»-ից, և 101 հազար դրամ էլ՝ Շուշիի տեխնոլոգիական համալսարանից։ Ծախսերի մասին որեւէ տվյալ Վահագն Խաչատուրյանի հայտարարագրում ներկայացված չէ։

Այսինքն՝ ստացվում է՝ նա ստացել է եկամուտ, բայց կարիք չի ունեցել ծախսելու դրանք:

«Հրապարակ» թերթը գրում է.

Երեւանի կրկեսը փակվեց մոտ 12 տարի առաջ։ Ի լուր ամենքի հայտարարվեց, որ «Տաշիր» ընկերությունը որոշել է իր հաշվին նոր կրկես կառուցել` հին կրկեսի տեղում, որը կլինի ժամանակակից եւ աշխարհի լավագույն կրկեսներին չի զիջի: Շենքում շինարարական աշխատանքները սկսվել են 2011 թվականին՝ քաղաքապետարանի ու «Տաշիր» ընկերությունների խմբի միջեւ կնքված համաձայնագրով։ Սկզբում որոշված էր ընդամենը վերանորոգել շենքը։ «Երեւանյան կրկես» ՍՊԸ-ն, որը կառուցում է կրկեսը, ստանձնել էր 650 մլն դրամի ներդրումային պարտավորություն, որի շրջանակներում ընդամենը հիմնանորոգում պետք է իրականացվեր, սակայն ընթացքում որոշվեց նոր շենք կառուցել, իսկ հինը քանդել։ Ներդրումային գումարը հասավ մի քանի մլրդ դրամի։ Պարբերաբար նախագծեր էին փոխվում եւ շինարարության ավարտի նոր ժամկետներ էին հաստատվում։ Ի սկզբանե նախանշված էր, որ կրկեսը շահագործման կհանձնվի 2015 թվականին։ Բայց նախագիծը փոխվեց, ու ամեն տարի բացումն ավելի էր երկարաձգվում։ Պարբերաբար պարզվում էր, որ նախագծերը թերի են, նորերն էին հաստատվում։ Իսկ թե ինչպես էին նախագծերը հաստատվում, եթե խնդրահարույց էին, չէր բացատրվում։

Այժմ նորից ասում են, որ Երեւանի կրկեսի նոր շենքի շինարարությունը մոտենում է ավարտին։ Հասել են աթոռների տեղադրման փուլին։ «Արդեն աթոռներն են դնում, մինչեւ տարվա վերջ շենքը կհանձնվի շահագործման»,- հայտնում է Երեւանի կրկեսի գեղարվեստական ղեկավար, Հայաստանի կրկեսային գործիչների միության նախագահ Սոս Պետրոսյանը։ Նոր շենքի դահլիճում շուրջ 2 հազար 300 նստատեղ է լինելու, այն ավելի բարձր է լինելու, քան հին կրկեսը, եւ այլ նորամուծություններ։

Իսկ ի՞նչն էր շինարարությունն այսքան ուշացնելու եւ 12 տարի երեւանցիներին կրկեսից զրկելու պատճառը, պատասխանատուներն ընդամենը հայտնում են, որ բարդ շինարարություն է, եւ այդ պատճառով հեշտ չէ այն ավարտելը։ «Տաշիր գրուպը» մի անգամ նույնիսկ տուգանվել է` ներդրումների թերակատարման համար, 80 մլն դրամով։ Բայց կառավարությունն ամեն տարի նոր որոշումներ է ընդունել` նոր ժամկետներ է հաստատել։ Իսկ շինանձնակազմն այս տարիներին անընդհատ պատմում էր, որ, ահա, շուտով շենքը կհանձնվի շահագործման, կրկես գնալու հաճույքից զրկված երեւանցիներին հեքիաթներ էր պատմում, թե ինչ լավն ու գեղեցիկ է լինելու նոր կրկեսը։ Շինարարության ավարտը չէր երեւում, մանուկների մի քանի սերունդ այս ընթացքում մեծացավ` չիմանալով, թե ինչ է կրկեսը։ Իսկ շենքն արդեն քանի տարի վերածվել է գովազդային վահանակի, որի վրա «Տաշիր գրուպի» գովազդն է պտտվում։

Վերջին անգամ, որպես շինարարական աշխատանքների ավարտ, հայտարարվել է 2021 թվականի վերջը։ «Երեւանյան կրկես» ՍՊԸ տնօրինությունը հայտարարում էր, որ շուտով կունենանք տարածաշրջանի լավագույն կրկեսը, որ մնացել է լուսային, ձայնային սարքավորումներ բերել, տեղադրել՝ Եվրոպայից, Չինաստանից։

Պատմում էին, որ նոր կրկեսը հնից անհամեմատ լավն է լինելու՝ ապակյա մի շինություն, բազմաֆունկցիոնալ գմբեթով, որից կկախվեն լույսեր, ճոպաններ ու ձայնային կոնստրուկցիաներ։ Անցավ 21 թվականը եւ էլի 2 տարի, բայց կրկեսն այդպես էլ չբացվեց։ Թե որքան գումար է ծախսվել շենքի վրա մինչ օրս՝ գաղտնիք է։ Քաղաքապետարանը չի ցանկանում խոսել թեմայի շուրջ՝ հորդորելով դիմել «Տաշիր գրուպ» ընկերությանը։ Մեր հարցմանն ի պատասխան՝ քաղաքապետարանից հայտնեցին․ «Կրկեսի շենքի շինարարությունը ժամկետի մեջ է»։  «Տաշիր գրուպից» պատասխան ստանալը, պարզվեց, բավականին անիրական բան է։ Այս ընկերությունը հասանելի չէ լրագրողների համար։ ԿԳՄՍ նախարարությունից` մշակույթի հատվածից էլ պատասխանում են, որ շենքի շինարարության հետ կապված՝ նախարարությունը գործառույթ չունի, այսինքն՝ լվացել է ձեռքերը։ «Մեր նախարարությունն ի սկզբանե համաձայնություն էլ չի տվել կրկեսի հետ կապված գործընթացներին»,- հայտնեցին ԿԳՄՍՆ-ից։ Որ մենք կրկես ենք ունեցել, որը չի գործում արդեն 12 տարի, սա կապ չունի՞ նախարարության հետ։ «Ոչ, այնտեղ շինարարության խնդիր է, մենք նախագծերը չենք հաստատել, ոչ էլ  համաձայնեցրել ենք։ Դա արել են քաղաքապետարանն ու քաղաքաշինության կոմիտեն»,- ասում է ԿԳՄՍՆ մամուլի խոսնակը։

Ստացվում է, որ որեւէ օլիգարխ, եթե կապեր ունի իշխանության հետ, կարող է Երեւանի սրտում ահռելի շենք վերցնել, վերացնել պետական հաստատությունը, ինչպիսին էր կրկեսը, տարիներով վիժեցնել դրա գործունեությունը, զրկել մանուկներին երազանքից։ Իսկ պետական մարմիններն ի զորու չեն լինի մի թթու խոսք անգամ ասել օլիգարխին, քանի որ նրա բարյացակամությունն իրենց շատ է պետք։

Հուսանք, որ կրկեսի շինարարությունն իսկապես մոտ է ավարտին, եւ մենք առաջիկայում ականատես կլինենք այդ հաստատության բացմանը: