Նյու Յորքում ՌԴ գլխավոր հյուպատոսության անվտանգության ապահովման միջոցառումներն ուժեղացվել են այն սպառնալիքների ֆոնին, որոնք գալիս են Ուկրաինայում Ռուսաստանի կողմից իրականացվող ռազմական գործողության պատճառով, ՌԻԱ Նովոստիին հայտնել է գլխավոր հյուպատոսի պաշտոնակատար Վյաչեսլավ Սլավկինը:

Ավելի վաղ նա պատմել էր, որ անհայտ անձինք սպառնացել են հյուպատոսության ուղղությամբ հրկիզվող խառնուրդով շշեր նետել, ինչպես նաեւ ականապատման մասին կեղծ հաղորդագրություն են ուղարկել:

Սլավկինը հաստատել է, որ հյուպատոսությունում անվտանգության ուժեղացված միջոցներ են սահմանվել։ «Այո, քանի որ մեզ մոտ ամեն օր գրեթե հակառուսական փոքր ելույթներ են տեղի ունենում հյուպատոսության շենքի մոտ», - նշել է նա:

Նրա խոսքով՝ շենքի մոտ են գալիս 5-20 հոգանոց խմբեր, որոնց թվում կան եւ անգլալեզու, եւ ռուսալեզու անձինք։ «Նրանց մեծ մասը ռուսախոս են», - հստակեցրել է Սլավկինը։ «Մենք մտցրել ենք հերթապահ պարետավորների ուժեղացված ծառայություն, որոնք ապահովում են անվտանգությունը։ Բոլոր բեռները, որոնք գալիս են մեզ մոտ, այժմ մանրակրկիտ ստուգվում են։ Ոստիկանությունն ապահովում է անվտանգությունը», - ասել Է դիվանագետը։