Քրոնիկ հոգնածությունը, հաճախակի մրսածությունը և տարբեր վարակները թուլացած իմունային համակարգի նշաններ են։ Ասել է Կենտրոնական Լանկաշիրի համալսարանի (Մեծ Բրիտանիա) կենսաբժշկության պրոֆեսոր Փիթեր Աբելը: Նրա և այլ փորձագետների խոսքերը մեջբերել է Daily Mirror-ը։
Ըստ Աբելի՝ կարելի է խոսել օրգանիզմի պաշտպանիչ ֆունկցիայի թուլացման մասին, եթե մարդը տարեկան երկուսից չորս անգամ տառապում է շնչառական կամ վիրուսային հիվանդություններով։ Նաև իմունիտետի հետ կապված խնդիրները առաջացնում են քրոնիկ մրսածության ախտանիշներ: «Այս վիճակի հնարավոր պատճառներից մեկն այն է, որ մարմինը չի արտադրում բավականաչափ լիմֆոցիտներ, որոնք հակամարմիններ են արտադրում՝ վիրուսային վարակների դեմ պայքարելու համար», - բացատրել է Աբելը:
Սննդաբան Սյուզի Փերին ասել է, որ երբ իմունային համակարգը թուլանում է, վիրուսային հիվանդություններին հաճախ ավելանում են բակտերիալ վարակները, որոնք կարող են ազդել լնդերի, միզուղիների, ստամոքս-աղիքային տրակտի և այլ օրգանների վրա։
Նա նշել է քրոնիկական հոգնածությունը և վատ ապաքինվող վնասվածքները՝ որպես այս խնդրի այլ ընդհանուր ախտանիշներ:
Թերապևտ Նադյա Հասանը բացատրել է, որ իմունային համակարգի անհավասարակշռությունը կարող է առաջանալ որոշակի քրոնիկ և սուր հիվանդությունների, երկարատև սթրեսի և վիտամին B12-ի, ֆոլաթթվի կամ ցինկի անբավարարության պատճառով: