Ֆրանսիայի նախագահ Էմանուել Մակրոնը Գերմանիայի կանցլեր Օլաֆ Շոլցին և Միացյալ Նահանգների նախագահ Ջո Բայդենին կոչ է արել «ռազմավարական երկիմաստության դիրք գրավել» Ռուսաստանի նկատմամբ՝ թողնելով «բոլոր ռազմական տարբերակները սեղանին»։ Գրել է The Wall Street Journal (WSJ)՝ վկայակոչելով պաշտոնյաների։

Նրանց խոսքով՝ Շոլցն ու Բայդենը չեն պաշտպանել այս դիրքորոշումը։ Մակրոնը գաղտնի բանակցություններ է վարել երկու առաջնորդների հետ։

Հրատարակությունը նշել է, որ Ֆրանսիայի նախագահի գաղափարն «արմատական ​​շեղում» է եղել այն դիրքորոշումից, որին հավատարիմ է եղել ԱՄՆ վարչակազմն Ուկրաինայում ռազմական գործողության մեկնարկից ի վեր։

WSJ-ը նշել է, որ «Վաշինգտոնի մոտեցումը տրամաչափված է, որպեսզի խուսափեն գործողություններից, որոնք կարող են հրահրել Մոսկվային»։ Մակրոնը, ընդհակառակը, ցանկացել է դադարեցնել Արևմուտքի «կարմիր գծերը գովազդելն» ու «փոխարենը ստիպել Կրեմլին գուշակություններ անել»։

Ըստ թերթի՝ Ջո Բայդենը կասկածի տակ է դրել ռազմավարության փոփոխության անհրաժեշտությունը՝ մտավախություն ունենալով, որ դա կարող է հանգեցնել զինված հակամարտության սրման։ Շոլցը չի պաշտպանել Մակրոնի գաղափարը՝ ասելով, որ դա կարող է «պառակտել դաշնակիցներին ու ՆԱՏՕ-ի երկրները դարձնել հակամարտության կողմ»։

Փետրվարի 26-ին Եվրամիության առաջնորդների հանդիպումից հետո Էմանուել Մակրոնը չի բացառել եվրոպական զորքերի տեղափոխումն Ուկրաինայի տարածք։ WSJ-ը նշել է, որ նա «ապշեցրել է դաշնակիցներին» իր խոսքերով։

Միացյալ Թագավորությունը, Հունգարիան, Գերմանիան, Իտալիան, Սլովակիան, Չեխիան ու Շվեդիան պաշտոնապես հայտարարել են զինվորականներ ուղարկելուց հրաժարվելու մասին։ Նման դիրքորոշում է հայտնել ՆԱՏՕ-ի գլխավոր քարտուղար Յենս Ստոլտենբերգը։