Ռուսաստանցի մի շարք քաղաքական գործիչներ և հանրային դեմքեր վերջին օրերի զարգացումները Հայաստանում գնահատում են որպես քաղաքական հետապնդում, ինչը, նրանց կարծիքով, պայմանավորված է Նիկոլ Փաշինյանի և Հայ առաքելական եկեղեցու միջև սրված հարաբերություններով։
«Այժմ մենք տեսնում ենք, թե ինչպես է Սամվել Կարապետյանը բառացիորեն ենթարկվում հարձակումների ամենաբարձր մակարդակում», - «ՌԻԱ Նովոստի» գործակալությանը հայտնել է Պետական դումայի պատգամավոր Համիթովը։ Նրա խոսքով՝ նման հարձակումները սկսվել են այն պահից, երբ Կարապետյանը բացահայտ աջակցություն է հայտնել եկեղեցուն, որին ուղղված Նիկոլ Փաշինյանի կողմից հնչում են ուղիղ վիրավորանքներ։
Համիթովը նաև ընդգծել է, որ նույնիսկ հանդիպումը կաթողիկոսի հետ դիտարկվում է որպես մեղադրանք ներկայացնելու հիմք։
«Ստացվում է, որ ժողովրդի իրական հեղինակություններին աջակցելն այսօր պատժելի է: Այդ դեպքում ի՞նչ անվանում կարելի է տալ Փաշինյանին»,- նշել է քաղաքական գործիչը։
Թեմային անդրադարձել է նաև RT հեռուստաալիքի գլխավոր խմբագիր Մարգարիտա Սիմոնյանը։ Իր Telegram-ալիքում նա գրել է.
«Էֆենդի Փաշինյանը, ով ձևացնում է, թե հոգ է տանում բոլոր հայերի մասին, այս պահին ձերբակալել է իսկական հոգատարին՝ Սամվել Կարապետյանին, որովհետև նա հանդիպել է հայ ժողովրդի հոգևոր առաջնորդի՝ Ամենայն Հայոց կաթողիկոսի հետ»։
Նա նաև արձագանքել է Փաշինյանի կողմից ավելի վաղ հնչեցրած հետևյալ հայտարարությանը. «Սա ձեզ համար Կալուգայի Նիժնի Տապռի գեղը չի։ Սա Հայաստանի Հանրապետությունն է։ Հույս ունեմ՝ պետության համը բերաններդ կմնա»։ Սիմոնյանը գրել է. «Տեսեք, հանկարծ ձեր բերանում տհաճ բան չհայտնվի»։
Ռուսաստանի գիտությունների ակադեմիայի Պրիմակովի անվան համաշխարհային տնտեսության և միջազգային հարաբերությունների ինստիտուտի հետխորհրդային հետազոտությունների կենտրոնի Կովկասի սեկտորի ղեկավար Վադիմ Մուխանովի կարծիքով՝ Կարապետյանը կարևոր դերակատար է Հայ առաքելական եկեղեցու համար։ «Կարապետյանը Հայ եկեղեցու հիմնական, եթե ոչ միակ խոշոր հովանավորն է։ Կաթողիկոսը հանրաճանաչ ու հեղինակավոր անձ է։ Փաշինյանին ներկայիս իրավիճակում պետք չեն ուրիշ ազդեցիկ դեմքեր՝ բացի իրենից»,- ասել է նա։
Պետդումայի վերահսկողության կոմիտեի նախագահի առաջին տեղակալ Դմիտրի Գուսեւը կարծիք է հայտնել, որ Կարապետյանի շուրջ ստեղծված իրավիճակը պետք է դիտարկել ավելի լայն քաղաքական համատեքստում. «Այն, ինչ հիմա կատարվում է Հայաստանում, միանշանակ նախագահական աթոռի շուրջ պայքար է»։
Նա նշել է, որ Հայաստանում ընտրությունները տեղի կունենան մեկ տարի անց, և սա միայն սկիզբն է տարբեր իրադարձությունների, որոնք, քաղաքական գործչի կարծիքով, տեղի կունենան ոչ միայն եկեղեցու, հայ գործարարների հետ կապված, «այլև այլ երկրների, օրինակ՝ Մեծ Բրիտանիայի և Ֆրանսիայի միջամտությամբ»։
Մինչ Հայաստանի պատկան մարմինները զբաղված են Սամվել Կարապետյանին մեղադրանք առաջադրելով, իսկ ամենաբարձր մակարդակով սպառնում են, որ ՀԷՑ-ը պետականացնելու են, Փաշինյանը շարունակում է հանդես գալ հայտարարություններով, որոնք, ըստ քաղաքագետների, ակնարկում են ընթացող զարգացումները։ Այն է՝ եկեղեցու և պետության միջև լարվածության նոր, վճռական փուլ։
Հասմիկ Պողոսյան