ԱՄՆ բանակը դատի է տալիս բանակի պաշտոնաթող գեներալ Մայքլ Ֆլինին, որպեսզի վերադարձնի հարյուր հազարավոր դոլարները, որոնք նա ստացել էր Ռուսաստանից եւ Թուրքիայից՝ նախքան 2017 թվականին ԱՄՆ նախկին նախագահ Դոնալդ Թրամփի ազգային անվտանգության խորհրդական դառնալը, գրում է The Washington post-ը։

Ըստ թերթի՝ բանակը Ֆլինից պահանջում է մոտ 40 000 դոլար այն բանից հետո, երբ պաշտպանության նախարարության գլխավոր տեսուչը նրան մեղադրել է, որ նա չի բացահայտել օտարերկրյա կազմակերպությունների հետ շահութաբեր գործարքների եւ այլ գործնական պայմանավորվածությունների մասին տեղեկատվությունը:

«Քննիչները պարզել են, որ Ֆլինը 2015 թվականին մոտ 450 000 դոլար է ստացել թուրքական եւ ռուսական շահերն առաջ մղելու, այդ թվում՝ Մոսկվայում ՌԴ նախագահ Վլադիմիր Պուտինի հետ խոսելու համար՝ առանց նախապես կառավարության թույլտվությունը ստանալու, ինչպես դա պահանջվում է»,- գրում է թերթը:

Նրան նաեւ վճարել են 2015 թվականի հոկտեմբերին կայացած համաժողովում ելույթի համար, որը հովանավորվել է Kaspersky Government Security Solutions ընկերության կողմից, «կազմակերպություն, որն, ըստ երեւույթին, վերահսկվում է ռուսական կառավարության կողմից», ասվում է պաշտպանության նախարարության գլխավոր տեսուչի պաշտոնակատար Շոն Օ'Դոնելի ծառայողական զեկուցագրում, հաղորդում է լրատվամիջոցը։

Ֆլինը շաբաթներ անց լքել է Թրամփի վարչակազմը՝ 2016 թվականի նախագահական ընտրություններին Ռուսաստանի ենթադրյալ միջամտության հետաքննության շրջանակներում:

Ավելի ուշ նա իրեն մեղավոր է ճանաչել այն բանում, որ ստել է ՀԴԲ-ին Թրամփի քարոզարշավի ժամանակ իր ռուսական կապերի եւ Սպիտակ տուն տեղափոխվելու մասին: Նա դատապարտվել է ազատազրկման, սակայն Թրամփը ներում է շնորհել նրան։