Եվրամիությունը 10 միլիոն եվրո կտրամադրի Հայաստանի կառավարությանը՝ նոր ձեւավորվելիք Ներքին գործերի նախարարության հիմնադրման ու ոստիկանության բարեփոխումների համար։ Այս մասին հայտնի դարձավ կառավարության հոկտեմբերի 20-ի նիստի ժամանակ։
ՀՀ ոստիկանապետի նախկին տեղակալ, քննչական գլխավոր վարչության նախկին պետ, ոստիկանության գեներալ-մայոր, Գագիկ Համբարձումյանը Եվրամիության շահագրգռվածությունը՝ ոստիկանության բարեփոխումների, Ներքին գործերի նախարարության ստեղծման մասով պայմանավորում է բացառապես Նիկոլ Փաշինյանի անձով։ Mediahub-ի հետ զրույցում Համբարձումյանը շեշտում է՝ Եվրամիությունը մտնում է այս դաշտ, որպեսզի իրենց հաճո դավաճան իշխանությունների պաշտպանությունը ավելի ամուր լինի։
«Ուզում են ցույց տալ, որ տեսե՛ք, թե ինչ բարեփոխումներ են անում «խաղաղության» գնացող իշխանությունները, ինչ ժողովրդավար են այս իշխանությունները։ Դեմագոգիայի, պոպուլիզմի հերթական դրսեւորման փայլուն օրինակ։ Եվրամիությունն է ֆինանսավորելո՞ւ տասնյակ միլիոնավոր պարգեւավճարները, որ բաժանում են սրանց, երբ դիրքերը կահավորված չեն, սպաները կոպեկ չեն ստանում։ Մենք մտահոգվելու շատ բան ունենք, այս իշխանությունն ինչ անում է՝ մտահոգվելու տեղիք է տալիս։ Պլանավորված տանում են երկիրը կործանման»,-ընդգծեց նա։
Նշենք, որ աջակցությունը կառավարությանը կտրամադրվի «ԵՄ-ն դիմակայուն եւ հաշվետու հսատատությունների համար. ոստիկանության եւ միգրացիոն բարեփոխումներն ու մարդու իրավունքների պաշտպանությունը Հայաստանում» դրամաշնորհային ֆինանսավորման համաձայնագրի շրջանակում։
Լիա Սարգսյան