Ձեռնարկատեր Իլոն Մասկը խզել է Twitter ընկերությունը 44 մլրդ դոլարով գնելու վերաբերյալ համաձայնագիրը: Նշվում է, որ ընկերությունը չի կատարել մի շարք պարտավորություններ, որոնք նախատեսված էին համաձայնագրով, այդ թվում՝ չի տրամադրել լիարժեք տեղեկություն, որը կարող էր ցույց տալ կեղծ օգտահաշիվների մասնաբաժինը, որոնք օգտագործվում են գովազդի նպատակով զանգվածային տարածումների համար:
Ավելի վաղ հաղորդվել էր, որ գործարքի պայմաններով, համաձայնագրի խզման դեպքում, ձեռնարկատերը պետք է ընկերությանը վճարի մոտ 1 մլրդ դոլար փոխհատուցում:
Twitter-ը գնելուց Մասկի հրաժարվելու ֆոնին Նյու Յորքի ֆոնդային բորսայում ընկերության բաժնետոմսերի գինն ընկել է 6,74%-ով՝ հասնելով մեկ բաժնետոմսի դիմաց 34,33 դոլարի:
Մասկը հանդիսանում է Tesla և SpaceX ընկերությունների ղեկավարը: Համաձայն Bloomberg գործակալության գնահատականների՝ ձեռնարկատերն առաջին տեղն է զբաղեցնում աշխարհի ամենահարուստ մարդկանց վարկանիշում: Նրա կարողությունը գնահատվում է 214 մլրդ դոլար: