Հայկական կոնյակ արտադրողների խնդիրները Վրաստանում ոչ միայն չեն լուծվում, այլև նրանք նոր խնդիրների առջև են կանգնում։ Մեկ ամսից ավելի է՝ հայկական կոնյակով բարձված բեռնատարները խոչընդոտների են հանդիպում վրացական սահմանին, որտեղ պահանջում են որակի փորձաքննություն անցնել, նոր շարժվել դեպի Ռուսաստան։ Դրա հետևանքով հայկական բեռնատարներն օրերով կանգնում են Վրաստանի Գիզի կոչվող բազայում, մինչև փորձաքննության պատասխանը գա։ ՀՀ կառավարությունն էլ՝ ի դեմս էկոնոմիկայի նախարարության, իբրև թե քայլեր է ձեռնարկում վրացական կողմի հետ այս հարցը լուծելու համար, բայց ոչ մի լուծում էլ, փաստացի, չի կարողանում տալ, և դա չի թաքցնում անգամ էկոնոմիկայի անկարող նախարար Գևորգ Պապոյանը։
Մի քանի օր առաջ աշխատանքային այցով Վրաստան էին մեկնել նաև պատգամավորներ, որոնց թվում էր Տնտեսական հարցերի մշտական հանձնաժողովի անդամ Բաբկեն Թունյանը։ Վերջինս մեզ հետ զրույցում ասել էր, որ կփորձի իր վրացի գործընկերների հետ նաև խորհրդարանական մակարդակով այս հարցը քննարկել և լուծումներ փնտրել։
MediaHub-ը Թունյանից հետաքրքրվեց, թե խոսե՞լ է վրացիների հետ այս թեմայով, և ի՞նչ արդյունքներ կան։ Պարզվեց՝ ոչ մի արդյունք էլ չկա, վրացիներն անգամ «տեղյակ չէին» այս խնդրից, ինչն ուղղակի զավեշտալի է։
-Պարոն Թունյան, ի՞նչ արդյունք տվեց Ձեր այցը Վրաստան հայկական կոնյակ արտահանողների համար առաջացած խնդիրների մասով։
-Դժվար է ասել, որովհետև հարցը ավելի շատ գործադիրի տիրույթում է, ուղղակի խնդիրը նաև խորհրդարանական գործընկերներին ենք ներկայացրել, որ իրենք էլ իրենց հերթին փորձեն նպաստել դրա արագ կարգավորմանը։ Այս պահին, իմ իմանալով, որոշակի տեղաշարժ կա, այսինքն՝ մեքենաների մի մասը թողնում են, մի մասը դեռ փորձաքննության մեջ են, բայց այցի հիմնական իմաստն այն է, որ բացի տեխնիկական դետալներից նաև քաղաքական կողմը քննարկեինք՝ թույլ չտալով, որ էդ տիպի խնդիրները ինչ-որ տրամադրություններ էստեղ գեներացնեն։
-Ի՞նչ եք հատկապես քննարկել վրացիների հետ այս մասով։
-Ես ասել եմ, որ մենք՝ որպես խորհրդարանականներ, պիտի այդ հարցերին էլ ուշադրություն դարձնենք, որովհետև, ցավոք սրտի, Հայաստանում կարող է այդ թեման լրիվ այլ կերպ մեկնաբանեն։
-Իսկ ինչպե՞ս արձագանքեցին իրենք Ձեր ներկայացրած խնդրին։
-Իրենք, բնականաբար, ասացին, որ խնդրին ծանոթ չեն, չնայած՝ ինձ ներկայացրել էին, որ խորհրդարանին տեղյակ են պահել էդ ամեն ինչի մասին, բայց ես իմ կողմից լրացուցիչ ներկայացրեցի խնդիրը, նաև ասացի, որ ես իրենց հավելյալ ինֆորմացիա էլ կուղարկեմ, ինչն էլ պատրաստվում եմ այս օրերին անել։
-Ձեզ համար զարմանալի՞ չէր, որ իրենք տեղյալ չէին այդ խնդրից, հատկապես այսքան բարձրացած աղմուկից, Վրաստանի դեսպանատան դիմաց իրականացված ակցիաներից հետո։
-Ես Վրաստանի դեսպանատան դիմաց իրականացված ակցիաների մասին էլ եմ իրենց ասել, բայց եթե մարդը ասում է՝ մենք տեղյակ չենք, դու չես կարող որևէ բան անել։ Բայց ես, իհարկե, իմ կողմից տեղեկացրել եմ իրենց խնդրի մասին էլ, ապրանքատեսակների մասին էլ, Հայաստանում տեղի ունեցողի մասին էլ ու էն դժգոհությունների մասին, ու էն դժգոհությունների մասին, որոնք գեներացվում են։
-Իսկ ի՞նչ ասացին, խոստացա՞ն, որ ինչ-որ բան կանեն։
-Խոստացան, որ հարցով կհետաքրքրվեն և զարմացան, որ կարող է նման խնդիր լինել, նաև խոստացան, որ հարցին խորամուխ լինելուց հետո իրենք իրենց կողմից ամեն ինչ կանեն, որ այդ հարցը կարգավորվի։ Հիմա ես սպասում եմ, տեսնեմ՝ իրականում ինչ-որ տեղաշարժ կա՞, թե՞ չէ, որովհետև կարևոր է նաև այնպիսի քայլեր չանելը, որոնք կարող են խնդիրը լուծելու փոխարեն ավելի խորացնել։
-Ձեր կարծիքով՝ սա ավելի շատ քաղաքակա՞ն խնդիր է, թե՞ զուտ տնտեսական։
-Չեմ կարծում, որ սա քաղաքական խնդիր է, երևի ավելի շատ տնտեսական, ու մի քանի այլ շերտեր էլ ունի իր տակ, ես այդքան շատ ինֆորմացիա չունեմ։
Վահե Մակարյան