Կառավարության այսօրվա նիստի օրակարգում ընդգրկված հարցերից մեկով շրջակա միջավայրի նախարար հակոբ Սիմիդյանն առաջարկում է հավանություն տալ «Եղանակի կանխատեսման և օդերևութաբանության ծառայությունների ոլորտում վարչական համագործակցության մասին» համաձայնագրի ստորագրման առաջարկությանը:
Նախագծի հիմնավորման մեջ ասվում է, որ Եվրասիական տնտեսական Բարձրագույն խորհրդի 2016թ. դեկտեմբերի 26-ի N 23 որոշմամբ հաստատված եղանակի կանխատեսման և օդերևութաբանության ծառայությունների մասով ազատականացման ծրագրով նախատեսված միջոցառումների իրականացման նպատակով Եվրասիական տնտեսական միության անդամ պետությունների իրավասու մարմինների միջև նախատեսվում է կնքել վարչական համագործակցության մասին համաձայնագիր։
Համաձայնագրի հիմնական նպատակն է ԵԱՏՄ ծառայությունների միասնական շուկայի՝ եղանակի կանխատեսման և օդերևութաբանության ծառայությունների ոլորտին առնչվող համապատասխան տեղեկատվության փոխանակումը, տեղեկատվության ազատ հասանելիություն ունենալը, ինչն էլ կբարձրացնի Համաձայնագրի Կողմերի (Հայաստանի Հանրապետության շրջակա միջավայրի նախարարություն, Բելառուսի Հանրապետության բնական պաշարների և շրջակա միջավայրի պահպանության նախարարություն, Ղազախստանի Հանրապետության էկոլոգիայի և բնական պաշարների նախարարություն, Ղրղզստանի Հանրապետության արտակարգ իրավիճակների նախարարություն ու Հիդրոօդերևութաբանական և շրջակա միջավայրի մոնիթորինգի դաշնային ծառայությունը /Ռուսաստանի Դաշնություն/) միջև փոխանակվող տեղեկատվության հավաստիության աստիճանը և կնպաստի փոխանակվող տեղեկատվության կառուցակարգերի կատարելագործմանը։
Համաձայնագրի կնքմամբ սահմանվում է նաև Կողմերի և հիդրոօդերևութաբանական ծառայությունների միջև տեղեկատվության տեղադրման, փոխանակման և տրամադրման շրջանակը։
Համաձայնագրի կնքումը կնպաստի նաև Կողմերի հիդրոօդերևութաբանական ծառայությունների միջև վարչական համագործակցության ամրապնդմանը։