Միացյալ Նահանգները չի ցանկանում ճնշում գործադրել Իրանի վրա, սակայն Վաշինգտոնը չի կարող թույլ տալ Թեհրանին միջուկային զենք ձեռք բերել, չորեքշաբթի հայտարարել է ԱՄՆ նախագահ Դոնալդ Թրամփը։
«Նրանք չեն կարող միջուկային զենք ունենալ: Ինձ հետ դա պարզ է: Իրանը չի կարող միջուկային զենք ունենալ: Մենք չենք ուզում կոշտ լինել Իրանի նկատմամբ: Մենք չենք ուզում կոշտ լինել որևէ մեկի նկատմամբ», - ասել է Թրամփը լրագրողներին Իրանի վրա առավելագույն ճնշման հրամանը ստորագրելուց հետո:
Թեհրանի վրա ճնշման քաղաքականության շրջանակներում մտադիր է հասնել իրանական նավթի արտահանման դադարեցման, հայտնել է նա Վաշինգտոնում Իսրայելի վարչապետ Բենիամին Նեթանյահուի հետ կայացած մամուլի ասուլիսում։
ԱՄՆ նախագահն ընդգծել է, թե ցանկանում է հասնել նրան, որ «իրանական նավթի արտահանումը հավասարվի զրոյի»։
Ըստ նրա՝ Իրանը կարող է անհավանական ապագա ունենալ, եթե հրաժարվի միջուկային զենք մշակելուց։
Թրամփը նաև հայտարարել է, որ պատրաստ է Իրանի հետ բանակցություններ վարել։
Նեթանյահուի հետ բանակցություններից առաջ պատասխանելով լրագրողների այն հարցին՝ արդյոք նա կարող է գործողություններ ձեռնարկել իրանական նավթի մուտքը համաշխարհային շուկա սահմանափակելու ուղղությամբ, ԱՄՆ նախագահը պատասխանել էր. «Դա անելու իրավունքն ունենք»։
Թրամփը նաև գործադիր հրամաններ է ստորագրել, ըստ որոնց՝ ԱՄՆ-ը դուրս է գալիս ՄԱԿ-ի Մարդու իրավունքների խորհրդից, ՄԱԿ-ի՝ Պաղեստինյան փախստականների հարցերով գործակալությունից։