Սոցիալական ցանցերը ակտիվ քննարկում են Երևանի ավագանու ընտրությունների արդյունքները, որոնք ի ցույց դրեցին այն հանգամանքը, որ Նիկոլ Փաշինյանի իշխանության հիմքերը խարխլված են:
Ինչպե՞ս է քաղաքական ու հասարակական դաշտն արձագանքում հետընտրական գործընթացներին. MediaHub-ը ներկայացնում է որոշ գործիչների մեկնաբանությունները:
ԱԺ նախկին պատգամավոր Նաիրա Զոհրաբյան.
«Եւ ուրեմն՝ ո՞վ պիտի ասֆալտ ուտի եւ բորդյուր լիզի։ Երեկ Նիկոլին ձայն տվեց Երեւանում ընտրելու իրավունք ունեցողների ընդամենը 9.3 տոկոսը։ Ի՞նչ պիտի անի ու ի՞նչ չպիտի անի ընդդիմությունը»:
Ռեֆորմիստների կուսակցության նախագահ Վահան Բաբայանը գրում է.
«Հիմա Երևանի ավագանի անցած 3 ընդդիմադիր ուժերը պետք է ապացուցեն, որ ունակ են միավորվել և քաղաքի կառավարումը ստանձնել: Եթե նրանց դա չհաջողվեց՝ հերիք չի, որ կփոշիացնեն իրենց տված ձայները, իրենք ևս կփոշիանան քաղաքական դաշտում»:
ԱԺ նախկին պատգամավոր Արմեն Մարտիրոսյան («Ժառանգություն» կուսակցություն).
«Նույնիսկ մասնակցության մի փոքր թվանկարչությունը հաշվի չառնելով իսկ պարզ է, որ հստակ առկա է քաղաքական ճգնաժամ։ Ընտրությունների նման ցածր մասնակցությունը ցույց է տալիս, որ հասարակության ճնշող մեծամասնությունը, մոտ 3/4, մասնակից ուժերին չի վստահել։ Քաղաքական պրոցեսները կամ պետք է տեղափոխվեն փողոց, կամ արտահերթ ընտրություններ։
Իսկ իշխանությունը այլևս անցյալ է, գոնե դե ֆակտո»:
ԱԺ նախկին պատգամավոր Ռուբեն Հակոբյան.
«Թշնամու մոտ լիզել պարապածի համար բորդյուր եւ ասֆալտ լիզելը դարձավ օրվա հրամայական...»:
Ռազմական փորձագետ Կարեն Վրթանեսյան.
«Ես չեմ շտապում «հաղթանակ տոնել» քանի որ հասկանում եմ, որ հականիկոլական գործուն կոալիցիա ստեղծելը շատ բարդ է։
Հասկանում եմ նաև, որ հենց այս ժամերին նիկոլաթուրքական ռեժիմն աշխատում է полный оборот-ներով, փորձելով վախեցնել, կաշառել, խաբել, գտնել իր հակառակորդների ճամբարում թույլ օղակը։
Սա նաև նշանակում է, որ մոտակա ժամերին կարող է սկսվել բռնաճնշումների նոր փուլ՝ աբսուրդի կրկեսի տարրերով։
Մի խոսքով, դեռ ոչ մի բան ավարտված չէ։
Բայց և կարևոր է ֆիքսել, որ «Նիկոլն ունի ժողովրդի մանդատը» հեքիաթն արդեն ֆսյո... #մանդատՉունես կարգախոսն այսուհետ իրականություն է։ Այս պահին սա ամենակարևորն է, ըստ իս։
Ընդդիմադիր ուժերը եթե ՀԻՄԱ ճիշտ, միասնական ու անձնվեր աշխատեն, ապա 1 տարուց կարող ենք ազատագրված Հայաստանում ապրել»:
Լեհաստանում ՀՀ նախկին դեսպան Էդգար Ղազարյան.
««Քաղաքացիական պայմանագիր» կուսակցության օգտին քվեարկել է Երևան քաղաքում ընտրական իրավունք ունեցող 824․250 ընտրողներից 75․463-ը կամ ընտրողների ընդհանուր թվի ընդամենը 9,1%-ը։ Սա դեռ այն դեպքում, երբ օգտագործվել է ողջ իշխանական ռեսուրսը՝ ներառյալ վարչական ռեսուրս, անհաշվելի և անվերահսկելի ֆինանսական միջոցներ, հանրային ողջ տեղեկատվական միջոցները, մասնավոր ընկերությունների կարողությունները։
Այս վարկանիշով ցանկացած քաղաքական կուսակցություն պետք է հրաժարական տա և հեռանա։ Բազմաթիվ են դեպքերը, երբ կառավարությունները հրաժարական են ներկայացրել տեղական ինքնակառավարման մարմինների ընտրություններում պարտությունից հետո։ Վերջին անգամ Վրաստանի կառավարությունը հրաժարական է ներկայացրել հենց այդ պատճառով։ Տրամաբանությունն այն է, որ եթե ժողովուրդը տվյալ քաղաքական ուժին չի վստահում, ապա ամենևին կարևոր չէ, թե որ ընտրությունների ժամանակ է դա տեղի ունենում»:
«Լուսավոր Հայաստան» կուսակցության նախագահ Էդմոն Մարուքյանը սրտնեղել է.
«Սիրելի՛ Երևանցիներ,
Այս պահին Երևան քաղաքի բոլոր տեղամասերի քվեների հաշվարկով՝ տեխնիկական գիտությունների թեկնածու, Երևանի ավագանու անդամ, ԼՀԿ ավագանու ցուցակի առաջնորդ Դավիթ Խաժակյանը չի ընտրվել Երևանի ավագանու ապագա կազմում։
Դավիթ Խաժակյանն անցած տարիներին պատշաճ, ազնիվ ու բարեխիղճ կերպով առանց որևէ վարձատրության ներկայացրել է Երևան քաղաքի բնակիչների շահերը Երևանի ավագանիում ու Եվրոպայի խորհրդի Տեղական և տարածքային իշխանությունների կոնգրեսում։
Դավիթ Խաժակյանն այլևս չի կարող ներկայացնել Երևանի բնակիչների շահերը ավագանիում, քանի որ նա չի ընտրվել այս ընտրապայքարում։ Դավիթ Խաժակյանը կորցրել է ձեզ ծառայելու հնարավորությունը, իսկ դուք կորցրել եք Դավիթ Խաժակյանի պես ավագանու անդամի կողմից ներկայացված լինելու հնարավորությունը։
Մենք մեր խորին երախտագիտությունն ենք հայտնում ԼՀԿ թիմի և Դավիթ Խաժակյանի օգտին քվեարկած յուրաքանչյուր քաղաքացուն։ Մենք դողալու ենք ձեր յուրաքանչյուր քվեի, ձեր վստահության վրա և շարունակելու ենք աշխատել ու պայքարել հանուն ինքնիշխան, ժողովրդավար և արդիական Հայաստանի Հանրապետության։
Միաժամանակ շնորհավորում ենք Երևանի ավագանու կազմում ժողովրդի կողմից ընտրված քաղաքական ուժերին և մաղթում նրանց հաջողություն՝ Երևան քաղաքի կառավարման գործում։
Աստված պահապան Հայաստանի Հանրապետությանը»: