Իրանի եկամուտը գազի արտահանումից իրանական օրացուցային տարվա առաջին 4 ամիսներին (սկսվել է մարտի 21-ին) 4 մլրդ դոլար է կազմել, ինչը հավասար է ամբողջ նախորդ տարվա ցուցանիշին։ Այս մասին հայտարարել է Իրանի նավթի նախարար Ջավադ Օուջին, փոխանցում է Shana-ն։

«Այս տարվա առաջին չորս ամիսներին եկամուտն ավելի բարձր է եղել նախորդ տարվա նույն ժամանակահատվածի համեմատ եւ կազմել է նավթի արտահանումից շահույթի հայրենադարձման եւ հում նավթի, գազի կոնդենսատի եւ բնական գազի վաճառքի 55 տոկոսը», - ասաց նա։

Նրա խոսքով՝ Իրանը սկսել է Ազադեգան հանքավայրի շահագործումը, եւ այժմ օրական 190 հազար բարել նավթ է արդյունահանում այդ հանքավայրից։ Նավթի նախարարությունն առաջիկա մի քանի տարիներին կօգտագործի երկրի տարբեր ֆինանսական հատվածների հնարավորությունները՝ արդյունահանման օրական 570 հազար բարել աճ ապահովելու համար: