Այսօր ԱԺ նախկին պատգամավոր Սամվել Ֆարմանյանի «Միայնակ ընդդեմ ճակատագրի» գրքի շնորհանդեսին մասնակցում էր նաև ՀՀ երրորդ նախագահ Սերժ Սարգսյանը, գրքի շնորհանդեսից հետո նա պատասխանել է լրագրողների մի քանի հարցերի։

Մեկնաբանելով 44-օրյա պատերազմում հայկական կողմի պարտության պատճառները, որոնց շարքում Փաշինյանը նշել էր բանակում  «հինգերորդ շարասյան» առկայությունը, Սարգսյանն ընդգծեց, որ եթե Նիկոլ Փաշինյանը գիտեր, որ «հինգերորդ շարասյուն» ենք ունեցել, ապա ինչո՞ւ միջոցներ չի ձեռնարկել դրա դեմ։

«Իմ նախագահության օրոք 5-րդ շարասյուն չենք ունեցել։ Եթե այդ մարդը գիտի, որ 5-րդ շարասյուն ենք ունեցել, բա ինչո՞ւ միջոցներ չի ձեռնարկել այդ 5-րդ շարասյան դեմ։ Միգուցե ինչ-որ տեղ նա ճիշտ է ասում, միգուցե ի՞նքն է գլխավորում այդ 5-րդ շարասյունը, եթե այդքան մանրամասն տեղյակ է՝ բնական է»,- նշեց Սերժ Սարգսյանը։

Ինչ վերաբերում է Պաշտպանության նախարար Սուրեն Պապիկյանի հայտարարությանը, որ 5-րդ շարասյանն ուղղորդում են դրսից, Սարգսյանը այն անլուրջ որակեց՝ հավաստի տեղեկությունների բացակայության պայմաններում։

«Ես դրսից կառավարվող այլ մարդկանց գիտեմ, ովքեր իրենց կյանքում 5-րդ շարասյուն չեն անվանի, ուրիշ մարդկանց չգիտեմ դրսից կառավարվող»,- եզրափակեց Սերժ Սարգսյանը։