Բազմաթիվ են եղել դեպքերը, երբ նախագծային լուծումը չի համապատասխանել բնության մեջ իրականությանը. խոսքը վերաբերում է նախագծի անորակ լինելուն։ Այս մասին Երևանի քաղաքապետարանի գործակարգավարական նիստի ժամանակ հայտարարեց Երևանի քաղաքապետի խորհրդական Կամո Արեյանը՝ անդրադառնալով վարչական շրւջաններում նոր կոմունիկացիաների ստեղծման գործընթացներին (ջրագծեր, գազատարներ, լուսավորություն, շատրվաններ և այլն)։

Ապա շարունակեց իր դժգոհությունները՝ կապված նախագծերի անհամապատասխանությունների հետ: «Բազմաթիվ են դեպքերը, երբ համաձայնեցումն իրականացվել է սկզբնական փուլում, սակայն շարունակություն չի ստացել։ Քաղլույսի պետերի հետ, տեղամասի պետերի հետ համաձայնեցրել են բակային տարածքների այգիների նախագծերը, ստացել դիտողություններ. վերջնական փուլը չի ստացվել։ Շատ դեպքերում մատակարար կազմակերպությունների կողմից կոմունիկացիաները անտեսվել են նախագծողների և փորձաքննության արդյունքում, և տարվա ընթացքում ունեցել ենք նույնիսկ խայտառակ դեպքեր, երբ նախագիծն ամբողջությամբ չի համապատասխանել իրականությանը բնության մեջ, նորից վերանախագծման խնդիր է դրվել»,- ասաց Արեյանը՝ նշելով, որ այդ ամենը համատեղ ուժերով հարթվել է։

«Նախագծվում է մանկապարտեզ՝ առանց հաշվի առնելու լրացուցիչ նոր հզորությունները, գազի նոր քանակը, հոսանքի նոր հզորությունը, և դա բերում է բարդության»,- ասաց նա՝ նշելով, որ ի պատիվ իրենց մատակարարների և փոխքաղաքապետի՝ լուծվել են այս բոլոր խնդիրները։

Արեյանը նկատեց, որ իրենք մեղադրում են նախագծողին, վերջինս ասում է, որ այսպիսի պատվեր է ստացել, կոմունիկացիաների վերանայումն ու փոփոխությունը չկա։

«Ուստի կխնդրեմ տեխնիկական առաջադրանքներն անել բարձր որակի։ Սա մեկ։ Երկրորդը, չընդունել այդ առաջարկին չհամապատասխանող նախագծերը։ Պատվերը հայտարարում ենք գնումներով մրցույթ, պատվիրատու վարչականի ղեկավարը կամ քաղաքապետարանի վարչության պետը կարող է հանգիստ չընդունել իր առաջադրանքի չհամապատասխանող նախագիծը, հետ ուղարկել, անորակ լինելու դեպքում, գնումների վարչության պետին եմ խնդրում նաև, միանգամից ուղարկել սև ցուցակ։ Պարո՛ն քաղաքապետ, չեմ ուզում լինել որևէ մեկի դատավորը, մենք ունենք բարձրորակ նախագծողներ։ Թո՛ւյլ տվեք լինել շատ անկեղծ,  շուկայում հայտնվել են ուղղակի մատիտ բռնող կիսագրագետներ։ Ու ապշեցնում է՝ դրանք ինչպես են ստացել լիցենզիան։ Եվ ամբողջ անորակությունն ու աշխատանքի հետագա բարությունը գալիս է այս աշխատանքի անորակությունից»,- շեշտեց Կամո Արեյանը։

Մանրամասները՝ տեսանյութում