Ամերիկյան արտաքին ծառայությունների ասոցիացիան (AFSA) և Կառավարության աշխատակիցների ամերիկյան դաշնությունը (AFGE) Վաշինգտոնի դաշնային դատարան հայց են ներկայացրել՝ պահանջելով վերաբացել ԱՄՆ Միջազգային զարգացման գործակալությունը (USAID):
«Այս գործողությունները ստեղծել են գլոբալ հումանիտար ճգնաժամ՝ կտրուկ դադարեցնելով ԱՄՆ ՄԶԳ աշխատակազմի, դրամաշնորհառուների և կապալառուների կենսական աշխատանքը: Դրանք արժեն հազարավոր ամերիկյան աշխատատեղեր: Եվ դրանք վտանգի տակ են դրել Միացյալ Նահանգների ազգային անվտանգության շահերը»,- ասվում է փաստաթղթում։
Հայցվորները երկու արհմիություններ են, որոնք ներկայացնում են ԱՄՆ ՄԶԳ աշխատակիցներին։ Պատասխանողների թվում են ԱՄՆ նախագահ Դոնալդ Թրամփը, Պետական դեպարտամենտն ու դրա ղեկավար Մարկո Ռուբիոն, ֆինանսների նախարարությունն ու դրա ղեկավար Սքոթ Բեսենտը, նաև հենց USAID-ը: