Հարավային Կորեայի դատախազությունը հինգ տարվա ազատազրկում է պահանջել Samsung Group-ի գործադիր տնօրեն Լի Չժե Յոնգի համար։ Հայտնել է Yonhap գործակալությունը։

Նա մեղադրվում է 2015 թվականին բաժնետոմսերի գները կեղծելու, հաշվապահական խարդախության ու 2 դուստր ձեռնարկություններ Samsung Cheil Industries Inc-ի և Samsung C&T Corp.-ի միաձուլման հետ կապված պարտականությունները խախտելու համար։

Միաձուլումը, որն առաջարկել է 3 Samsung C&T բաժնետոմս 1 Cheil բաժնետոմսի դիմաց, օգնել է Լի Չժե Յոնգին ուժեղացնել իր վերահսկողությունը Samsung C&T-ի նկատմամբ՝ Cheil-ում իր 23,2 տոկոս բաժնեմասի միջոցով։ 

Դատախազները եկել են այն եզրակացության, որ Samsung C&T-ի ենթադրյալ արժեզրկումը հանգեցրել է վնասների այլ ներդրողների համար:

Բացի այդ, պաշտոնյային մեղադրել են ենթադրյալ հաշվապահական խարդախության համար Cheil Industries-ի դուստր ձեռնարկությունում Samsung Biologics-ում, խնդրել են տուգանել նրան 500 միլիոն վոնով (մոտ 385,000 դոլար):

Լսումների ժամանակ Յոնգը նշել է, որ միաձուլումն իր դուստր ձեռնարկությունների մրցունակությունը բարելավելու՝ Samsung-ի ավելի մեծ ծրագրի մի մասն է, և հերքել է դատախազների այն պնդումները, թե ծրագրել է վնասել այլ բաժնետերերի՝ սեփական բաժնետոմսերը մեծացնելու համար:

«Որպես ձեռներեց՝ իմ պարտականությունն է շարունակել շահույթներ և աշխատատեղեր ստեղծել: Ես խնդրում եմ հնարավորություն՝ կենտրոնացնել իմ բոլոր հնարավորությունները բացառապես առաջ գնալու վրա»,- ասել է նա։

Դատավարությունը տևել է ավելի քան 3 տարի։ Եվ սպասվում է, որ դատարանը որոշում կկայացնի 2024 թվականի հունվարի 26-ին։

2021 թվականին Հարավային Կորեայի դատարանը կաշառակերության գործով Յոնգին դատապարտել էր 2,5 տարվա ազատազրկման։ Նա կրել էր պատժի կեսից ավելին և վաղաժամկետ ազատ է արձակվել: 2022 թվականի օգոստոսին նրան ներում է շնորհվել Հարավային Կորեայի նախագահ Յուն Սեոկ Յոլի կողմից։