Թաիլանդը համաձայնել է դառնալ BRICS-ի գործընկեր երկիր, ինչը կարևոր քայլ է դեպի ապագա լիիրավ անդամակցություն այս ասոցիացիային, ասել է Թաիլանդի ԱԳՆ տեղեկատվության վարչության գլխավոր տնօրեն Նիկոնդետ Ֆալանգկունը։
Ֆալանգկունի խոսքով՝ Ռուսաստանը՝ որպես BRICS-ի նախագահող, 2024 թվականի հոկտեմբերի 31-ին Թաիլանդին գործընկեր դառնալու պաշտոնական հրավեր է ուղարկել։ Դեկտեմբերի 24-ին կառավարության նիստից հետո որոշվել է դրական արձագանք տալ այս առաջարկին։
Նույն օրը Թաիլանդի արտգործնախարարը նամակ է հղել իր ռուս գործընկերոջը՝ հաստատելով իր համաձայնությունը գործընկերության հետ, փոխանցում է ՏԱՍՍ-ը։
Ըստ Ֆալանգկունի՝ BRICS-ի գործընկեր երկրի կարգավիճակ ստանալը կլինի առաջին քայլը Թաիլանդի՝ կազմակերպությանը լիարժեք անդամակցելու ճանապարհին։
Ավելի վաղ ՌԴ նախագահի օգնական Յուրի Ուշակովը հայտնել էր, որ հունվարի 1-ից Բելառուսը, Բոլիվիան, Ինդոնեզիան, Ղազախստանը, Կուբան, Մալայզիան, Թաիլանդը, Ուգանդան և Ուզբեկստանը ձեռք կբերեն BRICS-ի գործընկերների կարգավիճակ։