Անցյալ ամիս բրիտանական պարենային ապրանքների գներն աճել են ամենաարագ տեմպերով 1980 թվականից ի վեր՝ գնաճը կրկին վերադարձնելով 40 տարվա առավելագույնին:
Պարենային ապրանքների գները տարեկան կտրվածքով սեպտեմբեր ամսվա ընթացքում աճել են 14,6 տոկոսով՝ կապված հիմնական ապրանքների՝ մսի, հացի, կաթի, ձվի թանկացման հետ, հայտնել է Ազգային վիճակագրության վարչությունը: Սա սպառողական գների գնաճը հասցրել է 10,1 տոկոսի՝ ամենաբարձր մակարդակը 1982 թվականի սկզբից, որը նույնպես գրանցվել է այս տարվա հուլիսին:
Տվյալներն անմիջապես առաջ են քաշել պահանջներ, որ կառավարությունն ավելին անի ընտանիքներին եւ թոշակառուներին օգնելու համար, քանի որ նա ջանք չի խնայում վստահությունը վերականգնելու համար՝ չարաբաստիկ հարկային արտոնությունների փաթեթից հետո, որը ցնցել է ֆինանսական շուկաները: Ֆինանսների նախարար Ջերեմի Հանթը հրաժարվել է փաթեթից անցած շաբաթ պաշտոնը ստանձնելուց հետո, սակայն նախազգուշացրել է, որ ձմեռը դժվար է լինելու, եւ ծախսերի կրճատումներ նույնպես կպահանջվեն:
Սանդերլենդում Սուրբ Էյդան կաթոլիկ ակադեմիայի տնօրեն Գլեն Սանդերսոնն ասում է, որ ամբողջ երկրի դպրոցները դժվարանում են կերակրել կարիքավոր երեխաներին: Նրա խոսքով, նման պայմաններում պետբյուջեի կրճատման առաջարկը «սարսափելի է»։
«Ծնողները… ստիպված են դժվար որոշումներ կայացնել՝ վճարեն ավտոբուսի ուղեվարձը՝ իրենց երեխային դպրոց ուղարկելու համա՞ր, թե՞ այդ փողն օգտագործեն իրենց երեխային կերակրելու համար,- ասել է նա BBC-ին,- Այսօրվա հասարակության մեջ ես սա լիովին անընդունելի եմ համարում»: