Ադրբեջանի պաշտպանության նախարար Զաքիր Հասանովի նախագահությամբ տեղի է ունեցել ծառայողական խորհրդակցություն, որին մասնակցել են նրա տեղակալները, զորքերի հրամանատարները, նախարարության գլխավոր վարչությունների և ծառայությունների պետերը:
Ադրբեջանի պաշտպանության նախարարության մամլո ծառայության փոխանցմամբ, «խորհրդակցությանը տեսակապով մասնակցել են ազատագրված տարածքներում տեղակայված զորամիավորումների հրամանատարները»:
Հասանովը բարձրաստիճան զինծառայողների հետ քննարկել է «իրավիճակը Ղարաբաղի տնտեսական գոտում, որտեղ ժամանակավոր տեղակայված են ռուսաստանցի խաղաղապահները, և հրամայել է պատրաստ լինել ցանկացած պահին անմիջապես վճռական միջոցներով կանխել թշնամու կողմից սադրանքների փորձերը»:
Խորհրդակցության մասնակիցներին հայտնել են, որ վեց ամիս տևած մարտական պատրաստության փուլից հետո բանակում ստուգումներ կանցկացվեն:
Զաքիր Հասանովը հրամանատարներին հանձնարարել է «նոր ուսումնական շրջանում ուշադրություն դարձնել զինծառայողների պրոֆեսիոնալիզմին և զորքերի մարտական պատրաստվածությանը, ավելացնել դաշտային վարժանքների ինտենսիվությունը և բարձր պահել ստորաբաժանումների մարտական մակարդակը»։