Այսօր Արցախում գործադուլ և դասադուլ է իրականացվել։ Ստեփանակերտի Վերածննդի հրապարակում արցախահայությունը հավաքվել է հստակ՝ Արցախը հայկական պահելու պահանջով։

Արցախի ԱԺ նախագահի տեղակալ, «Միասնական հայրենիք» խմբակցության պատգամավոր Գագիկ Բաղունցը MediaHub.am-ի հետ զրույցում պատմեց, որ առավոտյան 11-ին ուսանողների մի մասը և պետական ապարատում աշատողներից շատերը ակցիա են իրականացրել։

«Մենք հստակ ձևակերպել ենք Արցախի ժողովրդի պահանջն ու կամքը՝ անել ամեն ինչ, որ Արցախը չհայտնվի Ադրբեջանի կազմում»,- ասաց նա։

Ըստ Գագիկ Բաղունցի, իրենց նպատակն է համախմբել ամբողջ ժողովրդին, ներկայացնել խնդիրը, որ պահը պատմական է, և յուրաքանչյուրը պետք է հասկանա՝ ինքը պարտավոր է անել իրենից կախված ամեն ինչ, որ պահպանի արցախահայության անվտանգությունն ու Արցախի հայկականությունը։

«Արցախի Հանրապետությունը չի կարող լինել Ադրբեջանի կազմում»,- շեշտեց նա։

Հարցին, թե ովքե՞ր են մասնակցել այսօրվա ակցիային, միայն ընդդիմությո՞ւնը, թե նաև իշխանական թևը, Գագիկ Բաղունցը պատասխանեց՝ ակցիան եղել է համապետական, մասնակցել է արցախցին՝ անկախ կուսակցական պատկանելությունից, անկախ քաղաքական հայացքներից։

«Սա արցախցու, Արցախը սիրողի պայքարն է»,- ասաց Գագիկ Բաղունցը։ Նրա խոսքով՝ այսօր, առավել քան երբևէ, պետք է միասնական լինել՝ հանուն գաղափարի, հանուն ազգի, հանուն հայ մնալու։

Նարե Գնունի