ԱՄՆ-ն եվրոպական ապրանքների վրա 50% մաքսատուրքերի սահմանումը հետաձգել է մինչև հուլիսի 9-ը, հայտարարել է ԱՄՆ նախագահ Դոնալդ Թրամփը։

«Մենք շատ հաճելի զրույց ունեցանք, և ես համաձայնեցի հետաձգել այն», - ասել է Թրամփը Եվրահանձնաժողովի նախագահ Ուրսուլա ֆոն դեր Լայենի հետ հեռախոսազրույցից հետո։

Ըստ նախագահի՝ կողմերից մինչև հուլիսի 9-ը ժամանակ կպահանջվի «լավ համաձայնության» հասնելու համար։

Այս օրը լրանալու է Եվրամիությունից ներմուծման վրա Թրամփի կողմից նախկինում կիրառվող 20 տոկոսանոց մաքսատուրքերի կասեցման ժամկետը։ Տոկոսադրույքը ներկայումս կազմում է 10%։ ԱՄՆ նախագահը սպառնացել էր արդեն հունիսի 1-ից բարձրացնել մաքսատուրքերը մինչև 50%։

Bloomberg-ի հաշվարկների համաձայն, եթե Թրամփը սահմանի 50 տոկոսանոց մաքսատուրքեր, դա կազդի ԱՄՆ-ԵՄ ապրանքների առևտրի 321 միլիարդ դոլարի վրա, կնվազեցնի ԱՄՆ ՀՆԱ-ն գրեթե 0.6 տոկոսով և կբարձրացնի գները ավելի քան 0.3 տոկոսով։