Վերջին օրերին Երևանի Ջոն Կիրակոսյանի անվան դպրոցի շուրջ աղմուկը չի մարում, հակառակը՝ կրքերը գնալով ավելի են բորբոքվում ու կլանել են անգամ աշակերտներին:

Ինչպես հայտնի է, երեկ թիվ 20 դպրոցի տնօրենի ԺՊ նշանակվեց Քրիստինե Դումանյանը, որը այս դպրոցի կոլեկտիվից չէ և նրա թեկնածությանը դպրոցում դեմ են: Այսօր վերջինս հանդիպում էր կազմակերպել դպրոցի ուսուցչական կոլեկտիվի հետ և այն բավականին բուռն է անցել:

MediaHub-ի աղբյուրը հայտնում է, որ տնօրենի ԺՊ-ն նախ ասել է, որ եկել է մեծ սիրով, մեծ ուրախությամբ, ուզում է ոչ պակաս սիրով կոլեկտիվի մասը դառնալ: Նշել է՝ որևէ մեկի տեղը չի եկել, հաստիքը թափուր էր, «թող տիկին Բաբաջանյանն էլ փորձի և եթե հաղթի՝ ես կշնորհավորեմ ու կգնամ»: Խոսքը, նշենք, դպրոցի մենթորի մասին է, ով հավակնում է տնօրենի պաշտոնին:

Ասացին՝ նա մրցութային փուլը հաղթահարել է, սակայն ԿԳՄՍՆ-ում հարցազրույցի փուլը չի հաղթահարել, և ընտրվել է Դումանյանը:

Ապա ասել է. «Եկեք ավելորդ խնդիրներ չստեղծենք: Ես պատրաստ եմ անվերջ ձեզ լսելու, բայց որոշում կայացնողը ես չեմ, մեկ տարի տեղը թափուր էր, թող Բաբաջանյանը նշանակվեր: Ես ուրախ եմ, որ ունեք ձեր թեկնածուն, բայց օրենք է փոխվել, և ամեն ինչ գործում է օրենքի շրջանակում»:

Նշենք, որ մթնոլորտը հանդիպման կեսից բորբոքվել է, ուսուցիչները սկսել են արտահայտել իրենց դժգոհությունը, իսկ դրան զուգահեռ աշակերտները միջանցքերում «բունտ են» արել՝ բարձր վանկարկելով «Բա-բա-ջանյան»: Մեր աղբյուրը նշեց, որ սա հուներից հանել է նորանշանակ տնօրենի ԺՊ-ին, նա առաջարկել է հանդիպումն ավարտել, որպեսզի դասապրոցեսը չխաթարվի:
«Ես պատրաստ եմ դժվարությունների»,- հավելել է Դումանյանը:

MediaHub-ը հիշեցնում է, որ անցած հինգշաբթի օրն ԱԱԾ-ն ներխուժել էր Ջոն Կիրակոսյանի անվան դպրոց և երեխաների աչքի առաջ բերման ենթարկել ֆիզիկայի ուսուցչին, ով մեղադրվում է անառակաբարո գործողություններ կատարելու մեջ:

Ի դեպ, մեր տեղեկություններով՝ դասապրոցեսը դպրոցում այսօր առավոտվանից խաթարված է: Մեզ ասացին, որ թեև դասերն անում են, բայց դասամիջոցներին աշակերտները շարունակում են վանկարկել «Բա-բա-ջանյան», «Բա-բա-ջանյան» և աղմկել: