Տարիներ շարունակ առանց նորմալ շրջակա միջավայրի փորձաքննության կառուցվեցին բազմաթիվ բարձրահարկ շենքեր, հատվեցին հազարավոր ծառեր, որը հիմա էլ շարունակվում է. Երևանը գտնվում է կիսաանապատային տարածքում։ Այս մասին MediaHub-ի հետ զրույցում ասաց բնապահպան Սիլվա Ադամյանը։ 

«Բոլոր նորմերը բարձր են, առավելևս՝ փոշու նորմը: Լրջագույն խնդիրների առաջ ենք կանգնած. այս տարի շատ քիչ տեղումներ ենք ունեցել, բոլոր նորմերն անցել ենք, շատ վտանգավոր վիճակ է, անգամ այս պայմաններում մարդկանց տնից դուրս գալն է վտանգավոր»,-ասաց Սիլվա Ադամյանը։ 
Ըստ բնապահպանի՝ 30 տարի շարունակ խախտվել են քաղաքաշինության բոլոր նորմերը, իսկ այսօրվա իրավիճակի մասին նույնիսկ պետական մարմիներն են օբյեկտիվորեն բարձրաձայնում, որ այն վատ է, բայց բարելավելու համար քայլեր էլ չեն ձեռնարկում։

«Ամբողջ տարածքները, որոնք հնարավոր է զավթել, զավթվել են, եղած այգիներն էլ շատ վատ վիճակում են, ամեն ինչ արված է, որ դա լինի հանգստի գոտի, ոչ թե կանաչ գոտի։ Դավիթ Անհաղթի այգին բետոնապատ է՝ այգու անվան տակ, և սա գլոբալ մասշտաբներով է կատարվում»,-նշեց Ադամյանը։

Բնապահպանն ավելացնում է, որ քաղաքը շրջափակված է բազմաթիվ ավազե հանքերով, որոնք բնականաբար իրենց բացասական ազդեցությունն ունենում են։

 «Սևանից դեպի Երևան ճանապարհին երկու կողմից ունենք սարեր, որոնք կտրել են ու ամբողջը ավազե հանքեր են։ Ասենք՝ հանք է, բայց նորմեր գոյություն ունեն, պետք է ջրեն, մաքրեն ոչինչ չի արվում, ամբողջը փոշի է, փոշին էլ գալիս լցվում է Երևան»,-ասաց Ադամյանը։ 

Մեր զրուցակիցը հիշում է երբեմնի կանաչապատ Խորհրդային Հայաստանը, երբ գիտնականներն էին կազմակերպում, թե ինչպես և որ տարածքները պետք է կանաչապատվեն, որ քաղաքը փոշու մեջ չկորչեր, առանձնացնում է Դալմայի այգիները, որ հիմա չկան։ 

«Վտանգավոր է մարդկանց համար, շատ լավ է, որ ձյուն տեղաց, մի քիչ փոշին կնստի, բայց մի քանի օր է այդպես լինելու, հետո նորից չորային եղանակ է»,-ասաց բնապահպանը՝ հավելելով, որ սա էլ բնապահպանական պատերազմ է, որի դեմ տարիներ շարունակ պայքարում են, բայց պետական մակարդակով ոչ մի ջանք չի գործադրվում, որպեսզի իրավիճակը փոխվի։ Բնապահպանը շարքային քաղաքացիներին խորհուրդ է տալիս իրենց շրջապատող տարածքները կանաչապատեն, թփեր, ծառեր տնկեն, տարածքը մաքուր պահեն, որովհետև իրենց փոխարեն քաղաքապետարանը դա չի անելու։

Հիշեցնենք, ավելի վաղ Ջրային կոմիտեի նախագահի նախկին խորհրդական Գևորգ Նազարյանը հայտնել էր, որ Երևանի օդի որակն այս պահին գնահատվում է «վտանգավոր» և խորհուրդ չի տրվում դուրսը երկար գտնվել։

Շուշանիկ Միսկարյան