Լավրովը կրկին «մոռացել է», որ ինքը ՌԴ ԱԳՆ ղեկավարն է, ոչ թե Ադրբեջանի շահերի պաշտպանը: Իսկ եթե ավելի կոնկրետ, ապա ՌԴ–ն համապատասխան ազդեցություն ունենալու դեպքում կպարտադրեր Ադրբեջանին ընդունել լուծման Կազանյան տարբերակը, այլ ոչ թե թույլ կտար Ալիևին վերջին պահին հետ կանգնել ու փախնել բանակցություններից:
Այս մասին Տելեգրամի իր ալիքում գրել է ադրբեջանագետ Տաթև Հայրապետյանը:
«Լավրովն էլ, կարծես թե, փորձում է Ռուսաստանի ձախողումները բարդել ՀՀ նախկին իշխանությունների վրա: Շատ քաջածանոթ ձեռագիր է:
ՌԴ–ն արդեն 50 օրից ավել է, ինչ չի կարողանում դրդել ու հարկադրել Ադրբեջանին բացել Լաչինի միջանցքը: Հիմա դրած «արդարացնում» է Ադրբեջանի ագրեսիան: Թեև ինչ կարող ենք ասել, երբ նման բան նաև անում են ՀՀ իշխող ուժի ներկայացուցիչները…»,- գրել է փորձագետը:
MediaHub-ը հիշեցնում է, որ ՌԴ արտգործնախարար Սերգեյ Լավրովն այսօր ծավալուն հարցազրույց է տվել, որում, ի թիվս այլ հարցերի, անդրադարձել է նաև ղարաբաղյան հակամարտությանը: Նա, մասնավորապես, ասել է, որ Հայաստանը երկար տարիներ «օկուպացրել է Ադրբեջանի շուրջ յոթ շրջան», Ռուսաստանն առաջարկել է բազմաթիվ տարբերակներ, որոնք Հայաստանի նախկին ղեկավարությունն այնքան էլ դրական չի ընկալել՝ ցանկանալով պահպանել տարածքներ, որոնց երբեք չի հավակնել։ Եվ հիմա, նրա խոսքով, «Ադրբեջանը վերադարձրել է իրեն պատկանող հողերը»: